近年唔少健康人士都會佩戴智能手帶或者Activity Tracker來統計每日卡路里消耗以及運動量，美國品牌Misfit繼Shine之後，最近再推出同類產品，名為Flash；用色、設計更年輕；最重要就係功能接近，但價錢平成半，五百蚊有找，好抵玩！

$499

提供Clasp（右）同埋Sport Band（左）兩款配件，Clasp可以夾於衣領、鞋面上，適合做運動；而Sport Band就可當手錶咁戴。

用家可以將Flash數據同步至《Misfit》App，記錄詳盡。

可查看朋友仔嘅運動進程，互相鞭策，又好喎！

採用一枚CR2032電池，換電毋須工具，揭蓋即可。

機面設有12粒LED燈，可顯示時間及運動目標的達成狀況。

6g超輕巧

Flash機芯若莫五蚊銀咁大，塑膠製作，重量只係6g，輕如無物！機芯表面有12粒圓點LED燈，除可顯示每日運動進度外，更可以指示時間，長着一點代表時針，閃動嘅一點則代表分針，用法特別。值得一提，同廠嘅Shine以輕敲方式顯示時間及運動目標，需要時間掌握技巧，今次Flash就改用按壓方式啟動相關功能，操作方便得多，而且可設定連按兩次或三次嘅功能指令，例如播放及停止《Spotify》音樂等等。

加配件變身

唔好睇小機芯細細嘅Flash，佢可以記錄一系列健康資訊，包括卡路里燃燒、行走距離、步行步數及睡眠監測；同已安裝《Misfit》App嘅手機配對後，即可查閱各項統計，甚至唔同時段嘅運動情況，相當詳盡。此外，Flash支援30米防水，帶埋佢游水都冇問題。原裝附送Clasp同埋Sport Band兩款配件，前者係個夾仔，可以夾於鞋帶、衣領或背囊上；後者用途同錶帶一樣，可以將Flash當手錶戴於手腕上。電量方面，Flash採用一枚CR2032電池，可使用長達六個月！

查詢：2722 7752

文：Vincent　攝：Bowie、Homan