Hot Toys嘅《Avengers︰Age of Ultron》（簡稱「AOU」）Figure大軍，喺電影上畫前已經登場，數數手指，主要大牌角色都幾乎出晒，唯獨Thor雷神遲遲未見影，照計冇理由漏咗呢個大隻佬。遲到好過冇到，AOU嘅雷神大人終於現身，由頭雕到服飾都係全新雕作，雷霆戰錘（Mjolnir）又新增發光功能，仲有AR（Augmented Reality）呢樣新Gimmick，原來今次HT係慢工出細貨、好戲在後頭。

除咗新增嘅發光版本，隨盒另有一個合金製嘅雷霆戰錘。

造型方面以《Thor︰The Dark World》嘅輕裝版為藍本，素體選用包膠款式，繼續爆肌。

AOU嘅Thor新增AR功能，用手機對準Figure，就可得出一張靚靚沙龍，氣勢似足電影海報。

頭雕與戰甲一樣都係重新製作，由Jong Hyuk, Park雕刻、JC. Hong塗裝，髮型更自然貼服，留意素體與戰甲之間多咗件藍色背心。

發光戰錘加埋特效組件，成個組合更加有Feel。

HT MMS306《Avengers︰Age of Ultron》 1/6 Thor
零售價︰$1,380
預訂價︰$1,330
推出日期︰今年第四季至明年第一季

喺一眾Avengers Figure之中，筆者認為Thor係最難整得好，事關Iron Man又好、Captain America亦好，每次有新嘅Super Hero電影推出，佢哋都會有全新嘅裝甲或戰鬥服設計，就連赤膊上陣嘅Hulk，喺「AOU」之中都換咗條貼身褲見人，造型變化好易認，反觀Thor無論由兩套同名電影以至兩集復仇者，全身戰甲都係大同小異，選角方面亦都一直由Chris Hemsworth擔正，未曾換角，故此製作Thor Figure，點先可以有新意？答案就係兩個字︰細心！

細節改動觀察入微

一如以往，今次嘅Thor Figure都係重新製作，就以頭雕為例，同之前嘅《Thor︰The Dark World》版本相比，就會發現眉骨位置再凸出咗少少，嘴唇就由微張變成緊閉，最重要係髮型貼服咗，令髮尾更加緊貼肩甲嘅斗篷，唔似之前拱起咗，感覺自然得多。服飾方面，驟眼看同《Thor︰The Dark World》版本一模一樣，其實又係重新製作，首先AOU版本喺包膠素體與戰甲之間加多咗一件藍色貼身背心，而戰甲上嘅圓盤外圍紋理，就由雕花改為凹紋，仲有戰甲上嘅圓盤及胸口中央嘅Y字形裝甲，AOU改為灰銀色塗裝，有別於《Thor︰The Dark World》嘅香檳金。凡此人設上嘅種種變動，就算有劇照參考，但係誇張啲講，幾乎要用顯微鏡先睇得到，難得HT都捕捉得到，讚！

發光戰錘夠入戲

同Thor出Figure嘅另一死穴，就係Parts極少，唔計造型手掌，嚟嚟去去都只有一個雷霆戰錘，冇計啦，無論由漫畫原著到電影版本，Thor實在太好打，一雙拳頭加埋雷霆戰錘已經無敵手，需要用其他武器咩？之前咁多款嘅HT Thor Figure，就以分量十足嘅合金，加埋精細雕工打造出雷霆戰錘，務求以高質素抵銷Parts款式少嘅問題，之不過同一招已經用過喺之前四款Thor Figure身上，唔通嚟到第五個Version都只可以一成不變？

今次HT終於有突破，首先AOU版本破天荒有兩個錘，一個係原來嘅合金錘，另一個改用透明膠件製成，錘頭內藏LED，備有發光效果；隨盒附有閃電形嘅特效組件，套入發光嘅雷霆戰錘上，就可加強出招氣勢，尤其是模仿電影中Thor以戰錘激活Vision一幕。除此之外，新版Thor仲同手機玩互動，只要粉絲預先喺智能手機下載「Avengers︰Age of Ultron AR Experience」App，之後開啟App，並將鏡頭對準Figure，就可啟動虛擬3D電影情景影像，屏幕上嘅Thor身邊唔只有雷電光效，仲有成班量產型Ultron攝入鏡做布景，就算玩家唔係攝影大師，都可Cap到呢張充滿氣勢嘅Figure沙龍，反應好嘅話，相信將來嘅HT Figure都會用埋呢招。

網址︰www.hottoys.com.hk

Facebook︰www.facebook.com/hottoyssecretbase

微博︰weibo.com/hottoyssecretbase

銷售點︰旺角彌敦道582-592號信和中心20樓Secret Base

查詢︰3722 3988

*圖片所示仍屬產品原型，與最後完成品或有少許分別。

文︰Dick（圖片由Hot Toys提供）