講火力，佢比唔上ZZ Gundam；論Gimmick，又唔似Z Gundam識變形；計血統，亦比唔上Gundam MK II嘅一脈相承，不過喺《Z》以至《ZZ》嘅高達小隊中，百式（MSN-00100，Hyaku-Shiki）嘅人氣絕對唔會比以上MS低，皆因冇角嘅頭部設計，加上全身金色塗裝，喺高達世界中前無古人亦後無來者，出晒位！既然MK II、Z及ZZ都已經喺Robot魂呢條商品主線現咗身，百式還會遠嗎？

唔只可動性高，接地能力都交足貨，冇PS亦冇Bostik，朝天腳甫士都企得穩。

受原裝機設所限，武器附件唔算多，只有基本嘅激光槍、火箭炮及激光劍。

手肘及膝頭都有雙關節，可以大幅度屈曲。

連接小腿與腳掌嘅油壓並非單一組件，透過多重組合做到連動伸縮。

隨盒附有兩款眼形設計嘅頭雕，設計原意就似MG Ver.2.0。

後裙甲內部都有雕功，實屬少見。

除咗只此一家嘅金色外觀，百式嘅另一個重要賣點，當然係出自機師古華多羅上尉，即係馬沙嘅化身。

Robot魂百式專用Mega Bazooka Launcher網上預購價：$270（未連運費）

巡航形態

每逢有百式嘅商品推出，相信大家最關注嘅，都係Bandai點樣表達金色嘅外觀，其實咁多年嚟，B記亦都用過唔少方法，例如HGUC及MG模型嘅「令面」全電鍍、HCMPRO嘅檸檬黃，以及早前MG Ver.2.0嘅沙金色，鹹魚青菜各有所愛，至於最近推出嘅Robot魂版本亦再搞搞新意思，髹咗重金屬感嘅金色塗裝，華麗程度介乎電鍍與沙金色之間，Metallic嘅質感相當重；不過就當筆者奄尖，前臂及背包嘅喉管，仲有腳掌外圍連底部等紅色位置都冇塗裝，只係以膠件原色示人，同主色嘅Metallic Gold唔多夾。還好整個Robot魂版本嘅高達小隊，都採用比原裝機設更加修長嘅造型，百式都唔例外，而且腰位特別幼、腳又零舍長，總算掙番唔少印象分，長腿叔叔嘅骨架，喺高達迷眼中根本好難輸。

兩款眼神切換

至於可動性方面，Robot魂百式更加難以挑剔，成組膊頭關節可以90゜移前，輕易做到雙手持槍嘅甫士；外掛式推進翼用Ball Joint與背包連接，唔會頂住雙手及腰位擺動；五塊腰甲都可以大幅度向上揭起，最抵讚係夠實淨，唔係以前嘅Robot魂咁易甩；連接小腿與腳掌嘅係真油壓，具有連動伸縮功能，唔係得個樣……凡此種種，令Robot魂百式可以輕易擺到各種甫士。附件方面，武器只係例行嘅火箭炮、激光槍及激光劍，Gimmick反而喺個頭度，隨盒附有兩個頭雕，輪廓相同，分別在於一個係傳統嘅墨鏡Look，即係眼位全黑一片，另一個就高達上身，髹上紅色雙目，邊款順眼就見仁見智，不過要留意兩者嘅天線都唔係軟膠製成，小心易斷。

地圖炮網上認購

至於百式嘅最強武器，堪稱地圖炮級數嘅Mega Bazooka Launcher，就以額外Boxset形式於網上接受訂購，除咗可以變成射擊與巡航形態外，隨盒附有專用嘅「魂Stage」地台，表面印有大大個「百」字，夠氣勢！

文︰Dick　攝︰Chun

查詢：2433 1828（瑞華行）　網址︰p-bandai.hk