學生平機過暑假 Leagoo Elite 3 Vs Huawei Honor 4C

眨吓眼就放暑假，達人G家姐個仔就升中學，有毛有翼，過埋呢個夏天就困唔住。於是佢阿媽就叫佢舅父我物色一部平靚正、唔使名牌、跌爛都唔肉赤嘅手機，等阿仔出咗街都可以「報到」。達人G就喺腦場搵到兩款千元貨色，一部叫Leagoo Elite 3，另一部係國產名牌Huawei Honor 4C，睇吓邊部啱外甥。

左：Leagoo Elite 3 $999（a）、右：Huawei Honor 4C $1,080（b）

用Honor 4C自拍時，只要按下快門，畫面右上角就有兩秒倒數預覽。

Elite 3內置《Leagoo Xender》檔案傳輸軟件，簡單操作即可分享圖片、音樂。

Honor 4C可以調校色溫，加上有2GB RAM，載入電子報表現流暢，放大縮細相當順滑。

Elite 3有個5.5吋芒，睇細字夠清晰，弊在操作有啲遲緩。

Honor 4C睇片時色調偏冷，暗位層次唔夠明顯。

Elite 3睇動作片聲畫表現唔錯，零舍有臨場感。

第1回合：鬥實用功能

今次達人G挑選呢兩款手機都各有賣點，唔係一味Sell平。先講Huawei Honor 4C，佢擁有500萬像素前置鏡頭，自拍模式內置兩秒縮圖預覽功能，影相時畫面右上角有得Preview，加埋十級實時美顏執靚膚色，討好女生可能係靠呢招。至於Leagoo Elite 3預載咗《Leagoo Xender》檔案分享軟件，毋須接駁USB或者上網，就可以喺Android同iOS裝置之間互傳資料，照片、音樂可直接拖過去第二部手機，中學社交必定有幫助。呢Round各有千秋，打和。

Draw!

第2回合：鬥瀏覽網頁

家陣人人都用手機上網，因此上網流暢與否，顯示清唔清晰都緊要。今次兩部手機都係用720p解像度IPS屏幕，雖則Elite 3有個5.5吋大芒，睇字夠清楚，但篤芒反應略嫌有啲拖泥帶水。Honor 4C有個5吋芒，可以調校色溫，令觀感更舒服，色彩對比度夠適中，加埋呢部手機少有地內置2GB RAM，開Apps爽快，睇電子報嗰陣，無論係放大縮小定轉頁，均順滑流暢，表現不錯。

Honor 4C Win!

第3回合：鬥煲片效能

細路唔睇師奶劇，但就會追YouTuber。試埋兩部手機嘅畫質，Elite 3上下窄邊框設計令視野好似闊啲，機背喇叭力水亦唔錯，睇《侏羅紀世界》預告片零舍有臨場感。至於Honor 4C影片顯示色調偏冷，睇《蟻俠》預告片時，見到主角套戰衣嘅灰黑色陰影層次唔夠強，就算改吓畫面色溫，深色位仍係好清，還好機背喇叭聲效不過不失，開到盡都唔會拆聲。

Elite 3 Win!