爸爸好拍檔Toyota Noah Luxury

每年到咗呢個時候，無論家長或者小朋友都最開心，因為考完試，大家都可以鬆番口氣，今日仲係父親節，不妨全家遊車河輕鬆一番，此時此刻，MPV就最幫手，朝早遊完車河，夜晚仲可以載埋爺爺嫲嫲外出食晚飯，齊齊慶祝父親節。今次試駕嘅豐田﹙Toyota﹚Noah Luxury，唔只有寬敞實用兼備嘅大車廂，又有智能停車熄匙系統﹙Smart Stop System﹚，進一步減少耗油量，慳番啲油費，幫囝囝囡囡儲定書簿費都好吖！

Toyota Noah Luxury

兩側車窗都有手動遮光簾，既可阻擋陽光，又可增加私隱度。

玩到攰，放平中排椅背，就變成小朋友嘅睡床。

打開雙天窗天幕後，車廂開揚度倍添。

中排座椅之間設有小茶几，方便放置飲品及小食。

中、後排座椅可以個別或一併收起，變成大片置物空間。

4.2”屏幕對應車上多媒體影音系統，兼有地圖功能。

全車座椅都係真皮製品，家庭車亦見出貴氣。

爸爸父親節快樂!

Noah嘅車身高度為1,825mm，離地距只有360mm，低地台配合開啟闊度達805mm嘅電趟門，唔只小朋友、長者，甚至連輪椅使用者都可以輕易進出車廂。車廂布局夠實用，中控台加上4.2"彩色屏幕，控制音響及閱讀行車地圖都相當方便，冷氣系統用上左右獨立布局，仲有花粉過濾器，照顧到全車人嘅健康，夠體貼。

中排移位超方便

今次試駕嘅係Luxury版本，採用2+2+3七座位布局，三排座椅都係高級皮革製品，尤其是中排兩張獨立座椅，中間設有小茶几及杯架，座椅又有滑動功能，可以前後移位810mm，藉此得出媲美飛機頭等艙嘅乘坐空間，而且座椅底部仲有小機關，後排乘客只需用腳踩落去，就可以令中排向前移，方便後排乘客自由進出，毋須假手於人。如果用唔晒七個位，但係要載BB車或大型行李，只需簡單步驟就可將中、後排個別或一併折疊起嚟，輕易騰出置物空間，加上車廂高度達1,400mm，放置高身物件都不成問題。

引擎顧家至識慳

性能方面，Noah所用嘅2.0L直四自然吸氣引擎，導入咗廠方獨有嘅Dual VVT-i及Valvematic技術，毋須任何增壓裝置，都有152ps馬力及19.7kgm扭力，配合新一代七前速CVT自動波箱，起步反應比上一代直接有力，而且波箱運作寧靜，換檔又快又順，直路加速相當有勁，最令筆者欣賞嘅係車身雖然高，不過高速轉彎時都冇明顯傾側，行車穩定性相當高。除此之外，引擎加入咗智能停車熄匙系統後，停車時會自動熄火，減少不必要嘅耗油，廠方公布嘅平均耗油量為14.7km/L，按現時油價計算，唔使$1.1/km，充分切合家庭用戶嘅實際需要。