早前因為歐聯決賽一役，令柏林成為全球波牛嘅聚焦點，依家勝負已分、曲終人散，不過估唔到柏林氣氛依然熱烈，雖則話柏林都有德甲球隊，不過咁多年嚟都冇乜冠軍相喎……做人唔好咁現實，其實德國人對足球嘅狂熱，又點會弱得過巴西人，何況adidas首座市區足球中心—THE BASE BERLIN啱啱開幕，唔只成為當地嘅新地標，甚至會成為新一輪足球革命嘅發源地。

THE BASE BERLIN將會日夜開放，仲有強光燈光加音樂襯托，踼波會唔會更加有節奏感呢？
地址：UferstraBe 8, 13357 Berlin

開幕當日，球王施丹大駕光臨，好似食咗防腐劑，唔只冇發福，就連皺紋都唔多覺，上天實在太唔公平了！

除咗施丹，奧斯爾（左）及靴里拉都係開幕禮嘉賓，而且同施丹一樣，即場落場試玩2 V 2足球比賽。

館內設有多個小型場地，而且有齊人造草及木板地；睇番香港，想搵場踢波都難，仲想有場地揀？發夢啦！

睇睇積分板，就會見到勝負唔只單計入球數，仲要計埋你嘅踢法夠唔夠可觀性，總之就要向悶蛋踢法說不。

完美配套 眾星技癢試場

adidas專登喺歐聯決賽前夕，進行咗THE BASE BERLIN嘅揭幕禮，而且安排咗多位球星，包括阿仙奴嘅奧斯爾、曼聯嘅靴里拉，仲有法國球王施丹嚟到試場，咁大陣仗，到底THE BASE BERLIN有幾巴閉？就算係知名球星，其實大部分同我哋一樣，都係踢街場、小型球賽開始，THE BASE BERLIN就係adidas發展基層足球嘅重錘一擊，於柏林Uferhallen興建咗一座佔地3,500平方米嘅室內場館，內裏唔只有多個人造草與木板足球場，仲有規模十足嘅觀眾席、熱身區、波Boot室，以及劃出一個開揚位置，畀球迷Show Off花式技術，配套咁完善，香港球迷係唔係好葡萄呢？

嶄新2 V 2 樂趣大過天

THE BASE BERLIN唔只係一個綜合式球場，而且係三間牌宣揚全新足球理念嘅舞台，事關內裏嘅小型球場，並唔係常見嘅7 V 7或者5 V 5，而係2 V 2，而且贏波嘅標準唔只單計入球數目，仲會考慮埋你嘅踢波風格及悅目程度。踢職業足球，勝負固然大過天，為贏波，大擺巴士陣都在所不惜，不過尋常百姓嘅衞生波，唔使咁功利、咁大壓力啫！adidas提倡嘅2 V 2小型足球，加埋新穎嘅計分方法，就係想球迷陶醉其中，搵番足球嘅真正樂趣，鍛煉個人技術之餘，仲可以激發創意，設計出屬於自己嘅盤扭大法以至入球新招。講到呢度，大家又唔使胃酸上腦咁慘情，因為THE BASE BERLIN將於本月13日正式對外開放，計劃到柏林旅遊嘅球迷，記住去朝聖了！