機甲筋肉人HT Iron Man Mark XLV

其實Iron Man Mark XLIII喺「復仇2」嘅出場時間，由初段帶到中段，仲長過後段先現身嘅Mark XLV，不過「鐵人」粉絲們對後者嘅期待度更高，事關Mark XLIII嘅外形設計，基本上同《Iron Man 3》嘅Mark XLII相同，只係顏色主次配搭由金×紅變成紅×金。Mark XLV唔只係全新設計，仲同以往歷代嘅Iron Man有好大分別。除咗山寨味濃嘅Mark I，由Mark II到Mark XLIV，輪廓上都以直線為主，Mark XLV就走出傳統，全身線條都變得渾圓化、流線化，充滿肌肉感，HT便成功將呢種擬人化嘅新設計，準確地變成1/6實物，留意兩肋、上臂以至大腿嘅氣孔位置，亦都整合於主線條之內，令全身嘅流線美學保持完整。

HT《Avengers : Age of Ultron》MMS300D11 1/6 Iron Man Mark XLV

除了正常形態，胸甲另備戰損款式，破損程度都幾重手。

背脊嘅擾流組件可以揭起，露出內裏嘅機械細節。

前臂可以加裝劍形雷射組件，展現Mark XLV特強嘅埋身戰能力。

HT Iron Man系列一向都有LED着燈Gimmick，Mark XLV又點少得？

Mark XLV大玩特效組件，隨盒備有連接咗火燄組件嘅造型手掌外，腳板又可加裝火燄組件，手手腳腳都做到火力全開。

片尾一戰於教堂爆發，所以仿沙石地台加上Ultron Senty殘骸，加倍連戲。

與以往直線條嘅Iron Man相比，今次大走流線設計嘅Mark XLV，就似機械版爆肌男，背部造型更見明顯。

HT《Avengers : Age of Ultron》MMS299 1/6 Iron Legion

雖然係量產型，不過Iron Legion嘅雙目及掌心依然有LED發光功能。

配色大異於主流Iron Man之餘，Iron Legion嘅身段亦比Iron Man瘦削得多。

前臂可以換件形式，呈現發射火箭嘅攻擊形態。

特效組件　火力全開

造型設計高分過關，可玩性又如何？首先，延續Mark XLII及XLIII嘅合金設計，作為MMS系列第300款作品嘅Mark XLV，亦都含有合金組件，配合金屬化嘅塗裝，質感更高亦更墜手。至於背脊嘅可揭式擾流，以及雙目、掌心及胸口反應器都有LED發光功能，其實都係意料中事，不過留意的話，就會發現胸口反應器外圍嘅裝甲設計，唔係常見嘅圓形或三角形，而係六角形，HT嘅設計團隊果然眼利。更加令人驚喜之處，係新增類似高達模型嘅特效組件，例如隨盒另備一對連接了火燄組件嘅造型手掌，而腳板又可加上火燄組件，模仿Mark XLV喺飛行狀態，尤其是片尾凌空撐起Sokovia時，手腳推進器火力全開一幕；除此之外，前臂又可加裝類似激光劍嘅特效組件，重現Mark XLV獨特嘅切割招式，睇睇吓，呢招同Unicorn Gumdam有九成似喎！

睇完《Avengers：Age of Ultron》（簡稱「復仇2」），我愈嚟愈相信導演兼編劇嘅Joss Whedon係一個高達迷，例如量產型嘅鐵甲軍團Iron Legion，地位似足吉姆（GM）及渣古（Zaku）；由《Z Gundam》開始，唔再一部高達打到尾，而「復仇2」嘅前、後段劇情，分別由Iron Man Mark XLIII及XLV出場；最精警係最後一幕Mark XLV獨力撐起飛咗上天嘅小市鎮Sokovia，唔畀佢跌落嚟變成隕石襲地球，仲唔係似足《馬沙之反擊》嘅Ending？咁有Gimmick嘅Iron Man，試問Hot Toys又點會錯過先？

Iron Legion　樸實量產型

被視為量產型Iron Man嘅Iron Legion，喺「復仇2」首度亮相，HT將佢連同Mark XLV一併發表。作為量產型，當然唔可以搶主角鏡，故此Iron Legion嘅整體造型較為樸實，唔似Iron Man咁標奇立異，而且佢係一台百分百嘅機械人，並非人形裝甲，故此HT版本用上硬直、紮實嘅主線條設計，腰肢與四肢都比較纖瘦，至於四肢、腰後以及頸椎嘅外露機械組件，更加有畫龍點睛嘅效果，進一步展現Iron Legion作為AI機械人嘅獨特形象。另一方面，大奸角Ultron Prime嘅前身係Ultron Mark I，而Ultron Mark I就係由一台破損嘅Iron Legion演變而成，大家有冇留意到，戲中每一台Iron Legion都有獨立編號，今次HT製作嘅Iron Legion「03」號機，正正係變成Ultron Mark I嗰部，之前已經訂咗Ultron Prime及Ultron Mark I嘅玩家，冇理由放過呢部Iron Legion啩！Mark XLV及Iron Legion嘅預訂價分別為$2,230及$1,330，為慶祝MMS系列衝破300大關，現時可以優惠價$3,360一併預訂Mark XLV及Iron Legion，有意儲齊HT「復仇2」角色嘅玩具迷，應該識揀啦！