Sony Xperia Z3+完美升級

Sony Mobile近期頻頻出機，繼上星期推出旗艦級平板電腦Xperia Z4 Tablet，今個星期就輪到旗艦手機Xperia Z3+出場。睇落新機同上代Xperia Z3幾乎一樣，不過就引入兩款新色之餘，連帶厚度、重量都有所下調，手感更好！加上處理器、鏡頭以至音樂播放都全面提升！

$5,698

前鏡頭備有500萬像素及25mm廣角，群拍都冇難度。

機側仍然備有獨立快門鍵，支援半格對焦，單手拍攝都得。

手繩孔移至機底位置，亦加入無蓋式USB。

機背用上強化玻璃，帶有反光效果，設計靚仔。

提供四色選擇，由上至下分別係「水映藍」、「雲石白」、「星鉑金」、「月夜黑」，兼且支援IP65/68防水防塵標準。

依舊用上5.2吋全高清屏幕，不過亮度就比上代提升咗16%，戶外都睇得清楚。

Xperia Z3+（左）設計其實同Xperia Z3（右）激似，唯一較明顯分別就係前置喇叭位置。

用上Snapdragon 810八核心64bit處理器，跑分接近五萬，效能極強。

支援耳機自動優化功能，會因應耳機特性優化音樂。

新增多個拍攝模式，包括AR面具、風格效果等。

試相
對焦快而準，而且成像層次分明，髮絲等細節都呈現到。

美食模式下拍攝，色調比實物更鮮明，呃Like靠佢！

坦白講，小記作為Xperia Z3嘅長期用家，第一次攞Xperia Z3+上手，都難以分辨兩機；新舊兩機設計幾乎似到足，同樣採用OmniBalance全方位平衡設計、鋁合金框架、前後強化玻璃都照辦煮碗，就連屏幕尺寸都一樣係5.2吋。不過Z3+厚度就由Z3嘅7.3mm下降至6.9mm，重量則由152g減少至144g，相當輕巧。另外，上代好顯眼嘅雙前置喇叭家陣就改為近似隱藏式設計，貼近上下邊框，更加簡約。Z3+除咗有「月夜黑」、「雲石白」兩款傳統配色，仲加入「星鉑金」及「水映藍」，「星鉑金」似足上代嘅金銅色，不過改用更淺色調，機側仲用上拋光處理，感覺都幾高貴；「水映藍」於不同光線下會呈現淺藍色或綠色，似足湖水色，感覺新鮮。

有單雙卡版本

硬件方面，作為今季旗艦機，Xperia Z3+都配備上頂級硬件，Snapdragon 810八核心64bit處理器、3GB RAM及32GB ROM全部有齊，上網、打機保證順暢。為迎合唔同需要，此機仲同時推出單卡同埋雙卡版本，想上網速度夠快的話就可以揀前者，皆因支援下載速度達300Mbps嘅LTE Cat 6制式；經常中港兩邊走可以選擇後者，支援內地適用嘅TD-LTE制式，北上都可以極速上網。順帶一提，Xperia Z3+支援IP65/68防水防塵標準，而且換上無蓋式USB插口，一拮即充電，唔使好似以前咁要打開保護蓋，方便得多；而且支援Wet-Finger Tracking，屏幕濕水後畫面都唔會大幅跳動，篤芒、畫畫都正常。

前置鏡頭越級跳

而Sony招牌嘅拍攝功能都有新搞作，雖然仍然用上2,070萬像素後置鏡頭及進階自動模式，不過場景就由上代36個增加至52個，當中比較實用就要數到Walk、Motion、Stable等手持模式及美食模式，後者會自動提高食物相片嘅色調，令食物睇落更新鮮、好味，擺上「面書」呃Like都易啲。而前置鏡頭升級就更加明顯，除咗由220萬像素提升至500萬像素，仲支援25mm廣角，而且引入以往後置鏡頭專用嘅進階自動模式及SteadyShot技術，自拍時更加穩定，效果自然好。影相之餘，聽歌都係日常必做嘅事，Xperia Z3+支援LDAC編碼技術，比一般藍芽傳輸快達三倍，配合支援相關技術嘅耳機，無線都可以聽到Hi-Res音樂。值得一提，Z3+有耳機自動優化功能，插入耳機後，手機就會根據耳機特點而優化輸出音樂。