韓流升呢　Kia Soul試真啲

根據筆者嘅非正式統計，近期好似多咗人留意韓國車，何解？揭揭價目表就有答案，今時今日，日系1.5L小房車嘅新車價都貼近$200,000了。反觀韓國車款，由性能、外觀、做工同隨車設備都升晒呢，同日系對手並駕齊驅時，價位依然「落後」，自然令唔少日系車用家都心思思想跳槽。就以起亞（Kia）Soul為例，輸港有Deluxe Two Tone Package及Deluxe Premium之分，今次就以前者作深入測試，雖然冇咗巨型天幕頂，不過車價只係$199,990，而且係2.0L級別，筆者就用四日時間，試真呢部韓國車嘅性價比有幾高？

啟動Mood模式，氣氛燈會自動變色，韓國車都有呢啲驚喜Gimmick，服未？

四四方方嘅車身造型，老老實實，似Fun Car多過SUV。

2.0L直四引擎力量充沛，表現唔會輸畀日本車。

後排空間相當寬敞，全拜2,575mm軸距所賜。

想增加置物量嘅話，放平後排椅背就成事。

未講內涵，先論外在美，Soul嘅造型四四方方，有別於傳統SUV霸氣凌人，老實講，如果唔係廠方將佢定位為SUV，相信大家都會當佢係「盒仔車」，加埋雙色車身配搭，夠破格、夠出位，以身作則說明現時嘅韓國車唔再係老套怪，唔係筆者賣花讚花香，Soul真係贏過唔少設計獎項，包括2014 Red Dot汽車設計獎、iF產品設計獎及IDEA（International Design Excellence Awards）銅獎，早就型盡海外。

引擎好力仲有加減波

揀車，乜都假，個Look幾靚都好，性能才是王道，邊個仲話韓國車唔夠力？Soul嘅2.0L直四引擎就有154ps，唔算驚喜，但一定唔輸蝕畀2.0L嘅日本車，何況Soul嘅定位係城市SUV，唔係打真軍Off-road嗰種，喺香港點會唔夠用？加上扭力有成19.5kgm，配合六前速自動波，仲有加減波功能，起步反應相當快，直路加速又夠爽。雖然車身偏高（1,600mm），但係筆者途經新田公路往元朗方向時，以100km/h行駛，車身依然保持穩定，令人放心。之後筆者駛入大棠山路，用埋加減波測試波箱反應，轉波過程一直暢順，未有半點遲疑，而且開住冷氣加坐足五個人上斜，依然有心有力。至於耗油量表現，原本滿油嘅Soul，呢四日行經新界連九龍合共409km，交車前到油站入番滿油，油費$633.19，實試之下每公里嘅平均耗油量約$1.5，以一款2.0L SUV嚟講，都算錫住車主銀包了。

實測四日乘客無投訴

筆者揸車一向都唔係勇字派，馬力兇唔兇狠並唔重要，車廂布局先至係最「貼身」、最計較嘅一環，同Soul相處咗四日，發現佢唔只係實用派、穩重派，仲畀到小驚喜。首先車廂高度達1,625mm，加埋2,575mm軸距，車廂相當闊落，尤其後排由Head-room到Leg-room都難有投訴，筆者試過由粉嶺去大棠，後排就坐咗三位男同事，身高由五呎五吋到五呎九吋不等，車程約45分鐘，呢三位壯丁事後表示都唔覺逼狹。乘坐空間有交代之餘，車尾置物量都唔算小，而且地台板下特設隱藏式儲物格，增加置物量之餘又夠晒企理。

變色Lighting 聊添新意

另一方面，中控台布局以簡約為主，勝在平實，加分之處係前排兩邊門壁設有動感音響氣氛燈，駕駛者可按心情調校做Music或Mood模式，前者嘅環形光管會透出紅光，仲會隨住節拍閃爍；改做Mood模式，燈光會自動變色，幻變出紅、橙、黃、青、藍及紫等顏色；不過筆者覺得有啲捉到鹿唔識脫角，皆因試車去到第三日，已經失去新鮮感，如果光管可以做大啲，或者連後排門壁都有，甚至可以同音響系統連動，隨住音樂節奏而變色嘅話，咁就更加有Feel！