黑莓裝Android　BlackBerry Leap

BlackBerry被公認為最安全嘅智能系統，可惜冇咩嘢玩；Android就娛樂豐富，但安全程度一直成疑。若能將兩者優點二合為一，你話幾好！黑莓全新手機Leap就做到兩者兼得，既擁有全面保安技術，又兼容各款受歡迎Android程式，一機玩盡兩大平台都只係賣$2,588，當副機用都抵。

採用5吋720p屏幕，並運行BB10系統，程式集布局帶Android影子，不難上手。$2,588

機背設有800萬像素鏡頭、補光燈及喇叭，並同時以圓點花紋點綴。

一機成型設計，SIM卡及記憶卡槽設於側面。

開關及3.5mm介面設於機頂，但前者過於扁平，唔多好。

透過Amazon App Store就可以「單撈」Android本土Apps，美中不足係中文遊戲少咗啲。

支援HDR、Time Shift、連拍及全景等拍攝「分唇」。

系統撥頁開Apps都順，但多工時始終有啲窒。

虛擬鍵盤反應及辨識度奇高，仲提供聯想字，打字恍如實體QWERTY咁爽！

預載《Docs To Go》，提供基本文書編輯能力。

BlackBerry Assistant可用於撥號、編寫短訊或上網查資料，功能多變。

5吋觸屏　打字爽快

先講外形，Leap跟以往黑莓機有好大分別，就係棄用實體QWERTY鍵盤，改以5吋觸控屏幕代替。雖然解像度得720p，論細緻銳利一定唔及全高清屏幕，但實測其虛擬鍵盤，反應及流暢度並不遜色，而且提供手寫、糾正同埋聯想字功能，打字覆Message講真比不少Android機爽好多！用料方面，受成本所限僅用膠殼，但背部就加入圓點花紋，配合弧形收邊設計，既吮手又感覺高貴；美中不足係重量高達170g，女仔拎難免覺得墜手！

全面加密　變種Siri

黑莓機向來保安出色，呢部亦唔例外，內置加密技術、抵禦惡意程式軟件及密碼管理員，全面保障文件及相片安全。佢亦預載BlackBerry Hub，可統一收發BBM、短訊、電郵及社交媒體訊息，內容又可同步至電腦或平板上，辦公一流！特別一提，黑莓首個助理程式BlackBerry Assistant佢都有，用法有啲似Siri，支援語音指令或簡單問答，雖然未對應廣東話，但起碼認到小記嘅港式英語，操作又多個方法。

硬件過時　可裝Android Apps

Leap內置1.5GHz雙核心處理器、2GB RAM及16GB ROM，當中處理器係幾年前級數，家陣睇難免過時，但以此運作BB10系統，操作卻出奇地靈敏暢快，而且廠方稱其運作時間長達25小時，證明廠商在效能及耐用度取得極佳平衡。另外，針對以往黑莓機予人過於平實嘅感覺，此機不但內置連拍、全景及HDR等拍攝「分唇」，仲可透過Amazon App Store下載Android程式，平時用開嘅《on.cc東網》、《布卡漫畫》、《美拍》統統有齊，安裝方法亦大同小異，令Android擁躉又多個轉會理由。