蝸居面積有限，當然要用盡空間。已屬於必需品嘅電腦就最令人頭痕，Laptop屏幕唔夠大，Desktop主機又太大件；最近Intel推出嘅Compute Stick就係斗室嘅福音，外形似足USB手指，不過佢唔單止可以儲存資料，而且仲係一部電腦！將佢插入任何備有HDMI插口嘅顯示器就用得，亦即係話屋企部電視都可以化身成電腦，一物兩用，咁仲唔夠慳位？

$1,499

連接電源後即會亮起藍燈，開機約需五秒。

體積比一條朱古力仲要細，非常輕便。

附送HDMI延長線，安裝位置更靈活。

任何備有HDMI插口的顯示屏都啱用，屏幕、電視都可以變身電腦。

有個掛繩孔，同鎖匙扣埋一齊就最好。附送HDMI延長線，安裝位置更靈活。

可以下載一系列Windows 8.1程式，操作、用法與一系列Windows平板相同。

試開《on.cc東網》網頁，Flash插件全部正常開到。

Compute Stick外形其實十足十放大版嘅USB手指，重量只有54g，體積就大概等於一支條裝朱古力；佢設有掛繩孔，方便用家掛起四圍去。Compute Stick的骰身軀入面有齊晒電腦硬件，包括Intel Atom Z3735F 1.33GHz四核心處理器、2GB RAM及32GB記憶體，亦預載Windows 8.1作業系統，規格同市面上唔少平板電腦相若。用法非常簡單，首先要透過microUSB連接電源，之後將配件插入任何備有HDMI輸出嘅屏幕產品就用得，換言之除咗電腦屏幕，仲可以選擇連接電視機甚至投映機，無論係屋企抑或辦公室使用都冇問題。

實試操作見流暢

現場試用，發現開機速度極快，五秒左右已經進入Windows登入介面；操作與一般Windows 8.1電腦、平板無異。雖然效能只屬一般，不過試開《on.cc東網》網頁、串流短片或者進行文書工作都見順暢。值得一讚嘅係，Compute Stick表面有大量散熱孔，令運行時唔會出現過熱嘅情況。唯一要留意係擴充性，因為佢僅提供一組USB及microSD卡槽，一般情況下前者會連接鍵盤及滑鼠；後者則可用作擴充容量。不過記憶卡容量有限，相信用家會傾向連接USB外置硬碟，為免長期佔用USB插口，小記就建議改用藍芽鍵盤同滑鼠。

SPEC

作業系統：Windows 8.1

記憶體：2GB RAM、32GB eMMC；支援microSD

處理器：Intel Atom Z3735F 1.33GHz四核心

對外連接：HDMI、Wi-Fi n、USB 2.0、藍芽4.0

體積：103.4×37.6×12.5mm

重量：54g

查詢 : 2753 1668