GM Cannon升級重生

80年代初嘅「MSV」，將高達模型帶上一個新台階，就以渣古為例，原來唔只有紅、綠色之分，仲可以有太空型、陸上型、水中型、沙漠型、高機動型等等數之不盡，令高達族譜幾何級數擴張開去，相信唔少70後、80後都買過MSV嘅模型，甚至連90後都會後追。時至今日，有好多當年嘅經典MS，依家仲好似輪候公屋咁樣，排緊隊等升級HG或者MG化，最近Bandai宣布，吉姆加農炮型（GM Cannon）終於可以喺輪候冊上除名了！呢款名機自從喺1983年出過1/144模型後，就一直未有出現喺Bandai嘅生產線名單上，等足32年終於解禁，仲升級做1/100嘅MG，高達迷點會唔感動？呢款新模型以MG GM 2.0為基礎，除咗喺右邊膊頭加上標誌性嘅240mm加農炮外，頭部、右胸、背部、腰部及小腿都係全新設計，隨盒水貼亦係新款式，製作起嚟比同類嘅手辦組件容易，完成度亦都更高。MG GM Cannon已經喺日本嘅Premium Bandai網站接受訂購，當地嘅稅前售價為¥4,000，預計八月派貨，香港方面亦已收訂中，售價$260（未連運費），模型迷要留意p-bandai.hk網站嘅消息了。