一套韓劇《來自星星的你》爆紅，令到韓星金秀賢瞬間成為全城各年齡階層女士眼中的男神，與此同時亦間接捧紅咗Reebok Pump Fury（其實劇中佢仲有着過Saucony、New Balance、Lanvin、Moschino及Le coq sportif等出品），令西裝襯Sneakers成為新世代韓風造型最潮指標。近日「都敏俊」再有新劇《Producer》《製作人》推出，並夥拍車太鉉、孔孝真及IU齊齊飾演電影節目製作人及歌星等，挾前作強勢餘威，相信劇中所穿着的單品都會被瘋狂追捧，家吓入定貨都差唔多！

李智恩（IU）、車太鉉、孔孝真及金秀賢齊以簡約素色打扮示人。

另一款官方宣傳海報四位主角打扮就較有睇頭，但都是以簡約為主，想睇大量名牌靚衫麻煩自己重溫「千頌伊」！

車太鉉腳上一對adidas Originals ZX Flux唔知會否被Fans搶購一空？

adidas Originals ZX Flux

「導演櫈」完全係呼應新劇導演角色而設。

Thom Browne 外套

Reebok Pump Fury OG

Lanvin Suede Sneakers

由KBS電視台最新推出的新劇《Producer》，製作班底由《來自星星的你》編劇朴智恩與知名綜藝節目製作人徐秀敏攜手打造，兩男兩女四位主角以電視人聚集地首爾汝矣島（KBS、MBC及SBS等等電視台所在地）為背景，講述電視台綜藝節目製作人之間的故事。官方宣傳海報上四位主角同樣以一系列簡約素色示人，畢竟做幕後係唔使好似做幕前長期處於「作戰狀態」，對於Fans而言咁就仲好，要模仿偶像打扮簡簡單單買件灰色衞衣、格仔恤衫就得，唔使左撲右撲對黑紫色Pump Fury咁慘，但留意金秀賢衞衣入面着咗件條子恤衫玩吓Layer叫做無咁悶。車太鉉打扮就真係十足十電視台導演，格仔恤加白Tee襯洗水牛，唔好話韓國導演，相信本地電視製作人見到都好有Feel，暫時唯一較突出都係腳下一對adidas Originals ZX Flux，Fans要跟同樣易過食生菜！

監製上身 代言ZIOZIA

講番金秀賢，佢過往曾為美國旅行箱品牌Samsonite RED及韓國戶外運動服裝品牌BEAN POLE代言，近日隨新劇推出，韓國男性服裝品牌ZIOZIA亦同步將其代言人造型照公開，當中一身簡約配搭與其所飾演的新進節目導演角色一脈相承，其中一張坐着「導演櫈」更十足十劇照一樣，今季一對休閒Slip On扮導演真係唔少得。

經典回帶 《星星》潮服造型

以《 Producer》部分宣傳海報、官方劇照嚟睇，前作《來自星星的你》入面金秀賢造型的確係高收視好多，又Thom Browne又Lanvin，件件唔貴唔着，淨係睇波鞋都睇到目瞪口呆，但試問廣大潮男會認為「做導演」易啲？定係「做外星人」易啲？前者買多兩件衞衣襯吓恤衫就得，而後者就要買幾十萬對波鞋先得喎！