藤子．F．不二雄嘅經典作品《忍者小靈精》，喺香港家傳戶曉，「又越過高山又越過谷，忍者身體似飛機，天空任意飛……」相信唔少70後，甚至80後都識唱，大家打邊爐時經常點嘅「獅子狗卷」，就係出自故事中獅子狗嘅最愛零食「竹輪」。最近本地薑Action Toys就推出咗EX合金小靈精Figure，除咗有豐富嘅忍具外，仲有大大塊風呂敷施展飛天之術，童年回憶返晒嚟！

EX合金《忍者小靈精》服部貫藏 建議零售價：$980

喺早前嘅日本玩具Show之中，廠方已經展出小玲瓏及金麥基等角色嘅監修版本，似足動畫設定。

專屬底座印埋《忍者小靈精》嘅日文Logo，夠晒原著味道。

除咗笑顏Look，亦都可以Face Off變成正經Look。

附件之一係忍術卷軸，隨盒就有相應嘅開掌組件擺甫士。

右手可以換成夾指造型，重現擲飛鏢嘅甫士，隨盒就有三枚金屬製飛鏢。

手腳嘅可動性都相當高，算得上係歷年玩味最高嘅小靈精商品。

軟膠製嘅風呂敷配合專用嘅手腳組件，就可變成飛天Look。

小靈精姓服部，係伊賀派忍者服部半藏嘅子孫，機警敏捷兼功夫耍家，飛天之術更係佢嘅看家本領。今次Boxset就有軟膠製嘅紅色風呂敷，只要將雙手及雙腳換成「夾被角」嘅造型組件，再大字形張開四肢，配合專屬底座，就可輕鬆擺出飛天甫士。

可動性歷來最高

至於可動性方面，整體質素相當高，尤其是咁多年嚟《忍者小靈精》嘅玩具都以搪膠景品為主，可動Figure較少，今次嘅EX合金版本算得上「物以罕為貴」；Figure多處以Ball Joint關節連接，連接身體嘅接觸點較小，想擺出富動感嘅拔刀、擲飛鏢等姿勢時，都唔會頂住頂住，抵讚，而且膊頭有拉出式機關，能夠將雙臂大幅度向前傾，換埋結手印造型手掌，就可忠實重現忍者唸口訣施忍術嘅招牌甫士。

惜含金量唔合格

不過有讚都有彈，就係以合金之名推出，但金屬用料偏少，只有腰位同髖關節有「含金量」，而且膠製嘅Ball Joint節扭得多又怕變鬆，影響擺甫士嘅持久性。另一方面，今次出得小靈精，又點會少得佢個細佬小玲瓏？廠方早前喺日本玩具展上，已經Show咗同系嘅小玲瓏連獅子狗Boxset，就連奸角金麥基連俏皮貓嘅監修版本都有彩模現身，聽講反應仲一致好評，相信商品化之日已不遠矣！無論小靈精、小玲瓏或者金麥基，差唔多30年後都冇老過，EX合金版本依然青春常駐，可恨的是識得佢哋嘅動漫迷，想唔認老都唔得囉！

查詢：2390 9843