喺《ZZ》TV版嘅故事尾段，奧干為咗提升ZZ Gundam嘅火力，因而設計咗FAZZ重甲，忠實粉絲一定記得，不過最後一戰ZZ VS Qubeley，原來卸甲後嘅ZZ「素體」亦都有所升級，名為Enhanced ZZ Gundam，並非原裝版本，呢段小資料就未必人人知，唔計手辦，一直以來模型、合金都冇出過，直到今期嘅Robot魂（R-No.179）先至首度實體化。與同系嘅原版ZZ Gundam（R-No.133）相比，就會發現新版本高咗又橫咗，頭頂高約14cm，比起原版多咗0.5cm，而且背包、肩甲、正面腰甲、小腿及腳板等位置都拉長咗，就連頭部亦有所不同，V形天線變粗咗，頭頂正中央嘅米加粒子炮都變大咗。至於武器附件依然係大型激光炮及一對激光劍，不過劍柄變長、變粗，最大分別都係背包頂部終於可以揭開，露出內藏嘅小型導彈。對ZZ系列有大愛者，就算之前已經買咗原版ZZ，相信呢款強化版都係唔買唔安樂，不過更期待嘅係Bandai幾時先肯出埋Qubeley先？

Robot魂R-No.179 MSZ-010S Enhanced ZZ Gundam
建議零售價：¥5,500

武器附件依然係槍劍兩類，兩者都大大把又唔輕，其實手肘位唔多夠力Hold住甫士。

強化版（右）同原版拍埋一齊，明顯見到高咗又橫咗，更有台型。

武裝方面同原版一樣，最大改變係背包頂部追加可揭式設計，露晒兩排導彈。

查詢︰2433 1828（瑞華行）