筆者利申在先，我真係好鍾意《機動武鬥傳》，因為有好重嘅香港元素，尤其係高達與高達之間嘅戰鬥場面，唔再係以往兩軍列陣互相炮擊，而係單對單大打拳頭交，有人話似《龍珠》，其實更似80、90年代嘅香港武俠片，事關導演今川泰宏原來係徐克嘅影迷；好似男主角多蒙．卡遜喺故事前半段嘅座駕閃光高達（Shining Gundam），必殺技Shining Finger就似足如來神掌加火雲掌嘅Crossover，好武俠呀！

Robot魂R-No.178 GF13-017NJ Shining Gundam
建議零售價：¥5,500

喺雙關節嘅基礎上加多一個水平關節，令成隻小腿可以360°轉到，令飛腳甫士更多變化。

留意部分造型手掌嘅接合處加多咗坑位，令手掌可以大幅度舉起。

由於可動性高，無論雙刀或單刀甫士都充滿力量感，夠英氣！

飛腳更Easy

繼神高達（God Gundam）及盟主高達（Master Gundam）之後，終於有第三款武鬥傳高達登陸Robot魂系列，佢就係神高達之前嘅主角機閃光高達。論號召力，佢未必比得上神高達及盟主高達，不過論可玩性，個人認為更好玩，首先唔似神高達及盟主高達有對大飛翼咁累贅，更易企穩甫士，加上關節設計落足心機，膊頭可以大幅度拉前之餘，最抵讚係膝頭雙關節之間加多一個旋轉關節，令成隻小腿可以水平狀態360°旋轉，擺飛腿甫士就有更多變化。美中不足係關節嘅受力度有待改善，尤其係髖關節嘅問題最為明顯。

掌風更凌厲

閃光高達有Normal Mode及Super Mode兩種形態，後者係專門出絕招，尤其是Shining Finger時必用，Robot魂版本嘅肩甲及前臂外甲都可升起，不過面罩與小腿外甲就唔似動畫設定咁樣打開，改用換件形式表達，雖然未能百分百「入戲」，但係考慮到Robot魂版本只有13cm高，為咗顧全造型美及耐玩性，呢個折衷方法都情有可原。至於附件方面，既有長、短激光武士刀各一把，當然唔少得Shining Finger；驚喜之處係部分造型手掌用咗新款接合位，增加手掌嘅舉起幅度，無論出爪或者出掌都更加傳神，更有功夫Feel。