2K上身　HTC One E9+ Dual SIM

由720p芒走到2K屏幕，很多品牌的旗艦手機屏幕愈見高解像，偏偏HTC依然用1,080p芒，競爭力明顯遜色。或許為回應市場呼聲，日前HTC新推出的E9+ Dual SIM（簡稱E9+）終於有個2K屏幕，配合2,000萬像素主鏡頭，影相同睇相都咁Sharp；留意售價僅$4,398，比同廠旗艦機M9仲要平，怪不得外界都話HTC今勻左手打右手啦！

外觀如M9倒模，並備有「白×玫瑰金」（右）同「炭灰×銀」（左）選擇。 $4,398

配備2,000萬像素鏡頭及單LED補光燈，但鏡頭凸出，要慎防刮花了！

前方設UltraPixel鏡頭，支援F2大光圈及24.7mm廣角拍攝。

保留BoomSound雙前置立體聲喇叭，對應Dolby Audio環迴音效。

除咗兩張SIM，仲可插記憶卡，擴充能力好強。

同M9（上）比較，E9+（下）屏幕較大，而且色彩、亮度及細緻度均較佳。

支援三級美肌，開到最大都唔會突兀，難怪Model力讚！

提供手動模式，可任意調校光圈快門、ISO、白平衡及曝光等進階設定。

RE新頸繩各$389

HTC向來定位清晰，「M」系最強，「E」屬中階，然而今次這部E9+卻將界線模糊起來，單是外觀就跟M9有九成相似，只係機身大一個碼，並同時把金屬機身改為塑膠，坦白講用料係不算紮實和高貴，但重量就減至149g，加上僅闊7.65mm，女仔拎其實仲自在。

屏幕勝M9

M9廣受好評的前後撞色設計，E9+都跟到足，並備有「白×玫瑰金」或「炭灰×銀」兩款選擇，個人比較Like前者，皆因對比度大，較搶眼，白色機背亦不易印上指模。要讚仲有它的5.5吋2K屏幕，現場用貓公仔相片比較，視覺比5吋M9闊許多，而且畫面銳利，貓毛盡現，連帶色彩亦較忠實還原，論畫面係同廠最頂級！

美肌夠自然

有個靚芒，就要有鏡頭配合。E9+主鏡頭達2,000萬像素，並支援4K超高清錄影，前置則加入自拍專用的UltraPixel鏡頭，對應F2大光圈及超感光技術，黑麻麻Selfie冇難度！實試所見，E9+對焦快、存相高速，色準、對比及顏色感覺都比M9好，而且仲有埋「自動自拍」及「聲控自拍」，笑一笑或講句「影啦喂」就影到相，方便程度無得輸！女士們必Like的仲有「即時美肌」，支援高中低高三個級別，Model試過就力讚執到自己皮膚又白又滑，而且效果唔假，加上仲可以後期瘦臉、袪油或放大雙眼，保證人人都可以最靚示人！

穿梭中港4G

硬件方面，考慮到Snapdragon 810處理器慶過火屎，廠方遂改用MediaTek MTK MT6795八核心處理器，雖然令Benchmark跑分打了折扣，未能觸及五萬分大關，但好處係機身Keep住涼爽，而且在3GB RAM加持下，撥頁開Apps流暢，起碼小記感覺不到有分別！叫得做Dual SIM，E9+支援雙卡雙待是常識，兼容中港及世界多地4G及3G網絡，並對應Dynamic Switch功能，可透過軟件直接更改SIM卡網絡模式，毋須手動轉SIM，合經常北上使用。