LEGO侏羅紀　靠嚇

「休館」14年，終於等到侏羅紀公園喺今年重開，作為「侏記」第四部曲嘅《Jurassic World》將於下月在港上畫，想當年嘅一、二、三集，一邊驚一邊睇；今次儲足14年功力再度開館，就算大家已經大個仔，都要預咗全場人再次嗌到失聲。筆者並無危言聳聽，皆因本月已經上架開售嘅LEGO®《Jurassic World》早就劇透，今集會有比起霸王龍（T.Rex）更厲害嘅新品種出場，問你驚未？

今集嘅「新主角」帝王暴龍，唔只更惡死、更有腦，白色造型更加令人眼前一亮，襯晒今年白色波鞋大熱。

Indominus Rex Breakout（75919）建議零售價︰$1,299

隨盒附有直升機及陀螺球兩種交通工具，睇嚟單薄原始，畀帝王暴龍捉到，睇怕九死一生了。

圍欄場景唔只戒備森嚴，仲有可動設計增加玩味。

男主角Owen騎住電單車英雄救美，幾有《Indiana Jones》嘅影子喎。

睇見Claire嘅造型，就估到佢係公園嘅科研人員，唔怕劇透多少少，佢都有份開發帝王暴龍，如果佢喺戲中有咩冬瓜豆腐，算唔算自作孽？

Raptor Rampage（75917）建議零售價︰$324

呢對速龍有名有姓，理應已經被馴服，不過獸性難移，遇到Owen及Clarie就追住唔放。

無齒翼龍（Pteranodon）出場Boxset：
Pteranodon Capture（75915）建議零售價：$249

雙棘龍（Dilophosaurus）出場Boxset：
Dilophosaurus Ambush（75916）建議零售價：$399

霸王龍（T.Rex）出場Boxset：
T.Rex Tracker（75918）建議零售價：$799

速龍（Raptors）出場Boxset：
Raptor Escape（75920）建議零售價：$499

阿爸嗰代，細細個時阿爺會嚇佢︰「你唔聽話，就會畀拐子佬捉咗你！」去到筆者做「塞豆窿」時，多得侏記三部曲唔少，輪到阿爸嚇我︰「你唔聽話，小心霸王龍會追住你嚟咬！」嚟到2015年，嚇細路嘅對白依舊，不過想In、想增加威力嘅話，記住將「霸王龍」改做「帝王暴龍」（Indominus Rex）了！

新恐龍更惡更食腦

其實官方Trailer及電影官網早就劇透，重開後嘅侏羅紀公園改名做Jurassic World，仲將啲恐龍馴服到好似海洋公園啲海豚、海獅咁款，日日做Show畀遊客睇，後來為咗刺激入場人數，竟然打基因工程主意，將唔同品種嘅恐龍基因進行混種，人工開發出一個新品種—帝王暴龍，點知研究人員計少樣嘢，就係帝王暴龍比霸王龍更聰明，可想而知當佢大開殺戒時，一定比霸王龍更難對付。新套裝「Indominus Rex Breakout」（75919）就預告有帝王暴龍衝出圍欄嘅一幕，仲有今集新加設嘅交通工具—陀螺球（Gyrosphere），平時用嚟做導賞之用，依家靠佢用嚟逃避帝王暴龍嘅追殺，唔多靠得住喎。

男主角Indiana Jones上身

帝王暴龍喺公園搞到天翻地覆，另一邊廂嘅男、女主角亦都畀恐龍追到氣咳。另一款套裝「Raptor Rampage」（75917）之中，擔任流動獸醫站嘅貨車受到速龍攻擊，一嚟就打孖，速龍出名兇殘、行動快又蠱惑，女主角Claire唔會天真到以為匿喺車內就安全啩？呢個時候男主角Owen連埋電單車現身，佢會點樣引開速龍令Claire脫身呢？