美、日、韓旗艦級手機樣靚花臣多，不過就好似大藍籌咁，唔係人人都有錢話入就入。因此，價錢抵玩，功能唔弱嘅國產手機近年大有市場，愈出愈有。近來市場中就有五款國產手機甚有噱頭，仲要係小米、魅族 （Meizu） 、聯想 （Lenovo） 、華為 （Huawei）、中興 （ZTE） 呢五大內地名牌出品，有晒業績支持，媲美潛力H股。呢排香港人日頭睇股市，夜晚翻煲炒股神劇，小記一於找來飾演年輕方展博嘅黃寶龍出嚟，一齊睇吓邊隻機壇嘅國企股至有實力，最重要係呢幾款手機啱邊類人用。

$2,299 （a）

圓渾機身有幼銀邊圍鑲，設計簡約平實之餘，手感仲相當好。

機頂部分除了雙色溫閃光燈外，音效插孔旁更設有紅外線連接裝置。

開啟《遙控助手》App跟其他家電配對兼調校，一機在手即可控制全屋電器。

$999 （b）

檸檬黃色機背充滿夏日風格，相比同廠的Vibe Z做得更時尚。

用Sabic三層PU物料製作外殼，就算用鉛筆劃花，都可以用擦膠捽甩。

機背底部雙喇叭支援Dolby Digital Plus，播歌出奇地好聲。

$3,080 （c）

$1,599 （d）

$1,649 （e）

ZTE Blade S6 Plus 啱玲姐 夠體貼

雖然玲姐唔係方家兄妹嘅親生媽媽，跟方進新又未有名分，但玲姐就視四兄妹如己出，辛辛苦苦揸小巴賺錢養大全家。如果大家屋企都有個似玲姐咁含辛茹苦嘅母親大人，有個5.5吋大芒嘅ZTE中興Blade S6 Plus就啱晒佢用，呢部手機定位中階，用Snapdragon 615處理器，支援4G、雙卡雙待，仲可以利用「親情模式」，將介面UI切換成大圖案顯示，媽咪年紀大唔夠眼力睇細字就Fit晒。另外，Blade S6 Plus採用圓角平滑設計，握上手個感覺都唔錯，最正係機頂部位設有紅外線連接，以中階手機而言確係少有，只要配合內置嘅《遙控助手》App，一機在手即可控制唔少家庭電器，免除唔見Remote以及要媽咪熟悉各類遙控操作之苦，可以得閒唞番吓！

SPEC

屏幕：5.5吋（1,280×720）

處理器：Qualcomm Snapdragon 615

記憶體：2GB RAM、16GB ROM

電池：3,000mAh

鏡頭：前置500萬像素、後置1,300萬像素

系統：Android 5.0

重量：139.3g

Lenovo樂檬A6000 啱慳妹 夠襟用

劇中「慳妹」為人零舍節儉，買餸會為一個幾毫同人家討價還價。你送貴機畀佢，佢會話番你亂使錢。呢啲識得錫住你荷包嘅女仔，5吋芒嘅Lenovo樂檬A6000就啱佢，檸檬黃色機背夠晒搶眼，賣$999，走入門路線，但係性價比超高，用四核Snapdragon 410處理器同埋1GB RAM，內置8GB ROM係少咗啲，好在支援內地部分地區4G上網，又有雙卡功能，最重要係佢個黃色機背係以Sabic三層PU物料製作，具防水防污功能，沾上污漬都可以用濕布清理，甚至用擦膠捽走，咁就可以歷久常新，用耐咗都唔怕殘舊，就正如扮演「慳妹」嘅Vivian一樣咁襟睇。

SPEC

屏幕：5吋（1,280×720）

處理器：Qualcomm Snapdragon 410

記憶體：1GB RAM、8GB ROM

電池：2,300mAh

鏡頭：前置200萬像素、後置800萬像素

系統：Android 4.4

重量：128g

Huawei Honor 6 Plus 啱紀文 夠貴氣

龍紀文老竇係前總華探長，屋企頗有錢，Huawei Honor 6 Plus就襯哂佢，佢嘅金色一款機身流露貴氣，而外殼係採用六層複合玻璃工藝炮製，表面有啲星空紋理，相當搶眼；而5.5吋芒亦達全高清級數。另有金屬包邊，更係一體成型，論手工都真係拍得住Apple、Samsung等大牌出品。另外，此機機背有個雙800萬像素鏡頭，除咗可以影到高質照片外，仲可以玩埋先拍攝後對焦特效，光圈仲由F0.95至F16任意調校，影淺景深有Mood相就無難度。最重要係Honor 6 Plus支援雙卡雙待雙通，食晒五模十六頻，兼容中移動及聯通嘅3G、4G網絡外，仲兼容唔少外國制式，去旅行到處飛都可以通訊無憂。

SPEC

屏幕：5.5吋（1,920×1,080）

處理器：Hisilicon Kirin 925

記憶體：3GB RAM、32GB ROM

電池：3,600mAh

鏡頭：前置800萬像素、後置雙800萬像素

系統：Android 4.4

重量：165g

小米4i 啱方婷 夠醒目

方家四兄妹中，以方婷學歷最高，大專未畢業已於報館兼職做記者，有腦又靚女，談吐有禮。呢類人用小米4i就最啱，皆因它有個1,300萬像素後置鏡頭，同埋500萬像素前置鏡頭，佢內置美顏功能，擺明係要分自拍神器市場一杯羹，Selfie美顏無難度之餘，仲可以估計相中人歲數，再根據估出嘅芳齡而提供相應嘅美白、美瞳效果，女生至冧。小米4i有個5吋高清芒，塑膠簡約多色機身勝在拎出街大方得體，又有「陽光屏」技術，識得因應外界環境自動調校對比度，兼且支援五模十六頻，方便外出公幹使用。加上小米產品口碑不俗，上班一族使用都唔會失禮。

SPEC

屏幕：5吋（1,920×1,080）

處理器：Qualcomm Snapdragon 615

記憶體：2GB RAM、16GB ROM

電池：3,120mAh

鏡頭：前置500萬像素、後置1,300萬像素

系統：Android 5.0

重量：130g

Meizu M1 Note 啱方敏 夠Young

讀緊書嘅么妹方敏品學兼優，成日跟同學溫書做功課。如果閣下家中都有個咁生性嘅下一代，有個5.5吋大芒嘅Meizu M1 Note就可以幫佢手返學Jot Notes。M1 Note具備色水靚靚嘅IGZO屏幕，睇電子書夠Sharp醒，更附有便籤記事同埋畫板塗鴉功能，啱晒用嚟寫日記、畫公仔抒發心情。另外佢有32GB ROM，儲歌、儲片都咁夠用，而且M1 Note豐富介面亦主打年輕人口味，只需連接網絡，即可於「個性化」選項揀選數千款心水桌面款式。

SPEC

屏幕：5.5吋（1,920×1,080）

處理器：MediaTek MT6752

記憶體：2GB RAM、32GB ROM

電池：3,140mAh

鏡頭：前置500萬像素、後置1,300萬像素

系統：Android 4.4

重量：145g

後記：黃寶龍睇好Lenovo新機

飾演童年方展博的黃寶龍，現實世界中並非股神，而係接掌家族二手書生意，呢門生意都一樣磨練出市場眼光。佢親力親為回收書籍，並留意存倉量，藉此了解到熱門書最佳 「出手」 時機等知識。佢仲用商業眼光嚟分析今次介紹嘅五部國產手機：「我好欣賞小米所引領嘅搶貨策略，成功畀大眾認識高CP值手機市場，而新出嘅4i手工討好，Selfie功能值得一讚；難怪M1 Note會視之為勁敵，兩者展開良性競爭。」另外，黃寶龍認為Honor 6 Plus走高檔路線有啲兵行險着，雖然賣相同功能都一洗山寨抄襲味，但係定價就成為用家選購嘅心理關口，仍需時間消化；反觀對Lenovo抱有期望，黃寶龍話：「之前機款感覺落後，但樂檬A6000就有Gimmick，夠新意，覺得長遠Lenovo可追趕小米、魅族！」至於中興部Blade S6 Plus，佢覺得設計同表現都不過不失咁啦！

查詢：（a）3759 0622、（b）8118 0800、（c）3791 2856、（d）mi.com/hk/mi4i、（e）www.meizu.com/hk