如果問AKB48邊個最靚？Iron Man定係Captain America好打啲？老老實實，各花入各眼，冇Model Answer喎，不過講到邊款Air Jordan最有型兼最受歡迎，AJ XI一定係「第一」，唔係「之一」，種種劃時代嘅設計，以30年後今日嘅眼光睇番，依然In得起，難得咁多年嚟每次復刻，無論係任何配色版本都一樣爭崩頭，更何況係最具代表性、配色最鮮明嘅Bred AJ XI Retro！

Bred AJ XI Retro Low

Bred AJ XI Retro Low明日接受抽籤登記。$1,349

公牛配色採用紅色透明外底，與其他版本相比，特別有戰意。

球衣號碼「23」及Jumpman Logo等代表性標誌，喺鞋踭位置一一落齊。

尼龍鞋面唔只有輕量化作用，而且比傳統嘅真皮更具簡約美。

無論中筒或低筒，AJ XI嘅漆皮鞋面設計，成功帶領AJ走出籃球鞋嘅框框，一躍成為潮流寵兒。

今期Jordan Brand真係同大家嘅荷包過唔去，今個禮拜初先話AJ VII Retro Hare可以上網登記抽籤，聽日就有另一款AJ接棒，而且號召力更強，甚至用全城瘋搶嚟形容都唔過分，佢就係Bred AJ XI Retro Low！

三大原因　非愛不可

究竟有咩咁巴閉？首先AJ XI嘅傳奇程度已經冇對手可比，佢係首款中底用咗石墨碳纖組件嘅AJ；仲開創籃球鞋嘅先河，首次用上漆皮鞋面，令成對鞋當堂Grand咗、型咗；當中嘅低筒版本，Michael Jordan本尊仲喺1996年NBA Final Game 1上半場着過，曇花一現更顯矜貴。其二係公牛色嘅AJ XI一定特別多捧場客，雖然Bred AJ XI Low都有兩個版本，分別在於用咗黑色及紅色內裡，96年波神所着嘅係黑色內裡，不過紅色版一樣多人搶，事關撞色效果比黑色版更醒神。第三個原因，就係AJ近年喺潮流界備受追捧，就連平時唔打波，甚至唔睇波嘅潮人，都要有番對AJ看門口；AJ XI夠型夠經典之餘，低筒版仲特別易襯衫。綜合以上三大原因，Bred AJ XI Retro Low有乜可能唔成為瘋搶目標？

粉絲記實　明日登記

我都知，上網登記抽AJ，其實同買六合彩冇乜分別，筆者抽咗咁多次都落空，更何況係Bred AJ XI Retro Low？不過做人要順其自然之餘，亦都唔可以未試過就話放棄，正如波神格言︰「I can accept failure, everyone fails at something. But I can't accept not trying.」，正如爭取真民主都係難上加難，唔通唔試咩？自問對Bred AJ XI Retro Low恨到發燒嘅粉絲，記住本周五至周日先上相關網站填好登記表格，之後就會進行抽籤，中籤者將獲通知，安排於本月23至26日到指定商戶選購；除咗以上所講嘅男裝版本，今次仲有女裝，登記時間為18至20日，至於開售日期同樣係23至26日，仲有Preschool及Toddler兩款童裝版本於23日登陸nikestore.com.hk。咪諗咁多喇，自問對Bred AJ XI Retro Low有愛嘅，抽咗先講！