飛鳥未老時HT 1/6 Batman Returns

現年63歲嘅米高基頓（Michael Keaton），人到中年藉着《Batman》（1989年）與《Batman Returns》（1992年）兩部大片而攀上事業高峰，可惜之後似乎無以為繼，一直等到充滿自嘲味道嘅《Birdman》於去年橫空出世，令大家記番起呢位好戲之人之餘，亦勾起條癮想重溫佢嘅Batman二重奏。心有同感者，除咗煲碟，儲Figure都得，事關繼89年版本（DX09）之後，Hot Toys最近炮製埋92年版嘅1/6 Batman，仲可以還原電影後段嘅爛罩Look，Batman粉絲想慳錢都難。

HT 1/6 Batman Returns

Figure高約32cm，全身關節就有30個。

戰甲線條比舊版淺好多，剛強味道係少咗啲，但係換嚟時代感，HT仲改用搪膠提升耐玩度。

黃色多功能腰帶內藏磁石，可以攝住部分配件。

隨盒備有三款表情組件，並內置轉眼系統，可惜硬頸依然不變。

配件大堆頭，全部造工精美有排玩。

造型手掌有九款之多，表面仲做足皮套紋理。

MMS294套裝跟埋破爛頭罩，可以套入真人頭雕，還原電影尾段嘅造型。

當年Batman Boots以AJ VI為藍本，HT喺呢方面都跟到足。

雖然並非DX系列，但係隨盒都有DX專用嘅方形發光地台，可見HT幾咁重視。

比起89年版，今代斗篷線條更加突出，下墜感更強。

今時今日嘅Batman可說型到核爆，Tim Burton與Michael Keaton實在應記一功，喺佢哋接手前，真人版Batman底衫着喺外面，而且水桶腰凸晒腩，騎呢有餘型格不足；擅長黑色美學嘅Tim Burton，唔只幫Batman換新Look，成個角色仲變得有深度，強烈嘅歌德式黑暗氛圍、流線型戰甲、低沉聲線配合高科技武器，將Batman由詼諧變成神祕，亦成為日後Batman嘅基本路線。貴為香港頭號「蝠迷」，HT主腦Howard早於四年前推出過89年版本嘅1/6 Batman，叫好又叫座，92年版本唔會唔出啩？經過長時間嘅周旋，HT喺去年終於攞到「拉臣」，而試辦亦剛剛現身。

搪膠流線型戰甲

與89年版本嘅爆肌戰甲唔同，92年嘅Batman戰衣以跑車為設計靈感，外觀平滑具流線型，胸腹嘅肌肉紋理較淺，整體造型更富現代感，正正因為線條變得簡單咗、流線咗，HT今次改用搪膠作為戰衣物料，呈現線條美之餘，仲解決埋舊膠料常見嘅出油及溶膠等老問題，玩家終於可放心長擺了。另一方面，Batman最叻飛簷走壁，為此斗篷改用PV物料製成，線條更加凸出，下墜感亦更強，配合四條內藏鐵線，細細力已經扭到飄逸效果；不過有讚亦有彈，電影人設嘅面罩同肩甲係連成一體，Figure跟到足嘅後遺症，就係同89年版本一樣「硬頸」到冇人有，頸位嘅可動性近乎零，好彩隨盒附有三款替換表情，加埋可動眼珠，雖然條頸擰唔到，但係仲可以轉轉表情Look。

套裝獨有爛罩Look

今次Figure分單裝及套裝雙版本，前者得一個Batman，後者連埋Michael Keaton頭雕、踢死兔禮服及破爛嘅頭罩。就試辦所見，由Jong Hyuk Park及Yong Kyum Kim聯手打造嘅頭雕，老實講神似度同預期有些許落差，不過質素上依然好過唔少副廠出品，而且畀多$800，就玩到西裝Look及爛罩Look，點計都抵。配件亦值得一讚，有齊繩索槍、Batmoble遙控器、探測蝙蝠飛鏢、索鈎槍、液態榴彈及訊號干擾器，夠晒足料，地台仲係DX系列先有嘅射燈設計，不過小記依然有投訴，究竟幾時先出埋Catwoman同Batmissile，等佢老哥無咁寂寞呢﹖

＊圖片所示仍屬產品原型，與最後完成產品或有少許分別。