Signature Shoe嘅文化，唔只喺籃球界及足球界流行，其實長跑界都有，雖然唔似前兩者咁星光熠熠，不過論意義深遠程度，絕對冇得輸。30年前，adidas就為長跑女王Grete Waitz推出咗首款Signature Shoe，呢位女王有幾巴閉？九屆紐約馬拉松冠軍加兩屆倫敦馬拉松冠軍，問你服未？

Grete 30 Boost W $799

Grete 30 Boost M $799

無論男女裝，鞋尾都有Grete Waitz嘅反V標誌外，鞋尾亦繡上呢位長跑女王嘅名字。

前掌中底用咗Boost，緩震之餘又有回彈作用。

中底設有Torsion System，加強前後掌嘅連接，減少足踝受傷嘅機會。

Energy Boost ESM M $1,299

今時今日，跑步文化大熱，而且無分性別，尤其是喺女生圈子，已經發展到與潮味掛鈎，對練跑嘅肉緊程度拍得住追韓劇。不過回想Grete Waitz嘅年代，女仔人家跑馬拉松，竟然要受世人嘅白眼；再將時間撥前到1967年，如果唔係Kathrine Switzer公然犯禁參加波士頓馬拉松，Grete Waitz嘅經典故事仲有冇可能發生，真係天知曉。

向長跑女王致敬

生於1953年嘅Grete Waitz，自小已經充滿運動天分，不過當時嘅體育文化依然重男輕女，女仔上體育堂玩玩就得，做運動員？只係畀人笑你天真。不過，想進步，唔只要有真競爭，仲要敢抗命，Grete Waitz就參加咗1978年嘅紐約馬拉松，亦都係佢嘅首項馬拉松賽事，結果一鳴驚人，唔只贏冠軍，仲刷新咗女子馬拉松嘅世界紀錄，之後Grete Waitz再贏多八次紐約馬拉松冠軍之餘，仲喺83年及86年兩屆嘅倫敦馬拉松加冕，堪稱為80年代嘅長跑女王，大大提高咗女子馬拉松嘅地位及獨立性，唔再被視為比賽中嘅附屬品。Grete Waitz喺1991年退出大型賽事，但退而不休，積極參與運動推廣工作，2011年因癌症而辭世，終其一身，為運動界，尤其是女子長跑不遺餘力，未忘初衷，可敬！

Boost加料　與時並進

喺長達十幾年嘅馬拉松歲月中，adidas稱得上係Grete Waitz嘅最忠實拍檔，因為由78年嘅紐約馬拉松開始，兩者已經聯袂上陣，85年三間牌更為她推出咗Signature Shoe。人去唔一定茶涼，Grete Waitz嘅傳奇已經鼓舞着一代又一代嘅跑手，而且今年係Grete Waitz Signature Shoe面世30周年，adidas就推出咗Grete Waitz 30 Boost，向長跑女王致敬。顧名思義，呢款新鞋用咗三間牌目前最頂級嘅緩震技術Boost，而且迎合目前流行嘅前掌落地跑法，將Boost設於前掌區，發揮緩震與回彈兼備嘅效果。至於賣相方面，就行復古路線，整個鞋面都以織物結構為主，似足80年代嘅跑鞋咁簡約，不過留意鞋身兩側嘅三間商標係直接繡上而非另行縫製，鞋頭嘅超薄支撐組件亦以熱熔方式組合而成，比起20、30年前嘅鞋款輕巧、貼服得多，而且橙×白×藍嘅配色組合，亦夠晒少女Feel。除咗上述嘅女裝配色版本外，同步仲有專為男生而設嘅藍×白，兩者都有齊「grete waitz」嘅繡字，以及Grete Waitz嘅反V標誌，將呢位運動名將致力男女平等、抗命不認命嘅精神，無分性別傳播開去。

Energy Boost白熱當道

正如上文所講，跑步文化繼續火熱當中，就算夏天將至，都唔係偷懶嘅藉口，況且三間牌多個跑鞋系列都趁機換色變新Look，你唔係想錯失扮Chok扮潮嘅機會啩！筆者嘅窩心推介係全白色Energy Boost，食正今期白鞋熱潮，練跑之外，用嚟襯衫作Casual Wear都絕對冇得輸，況且Techfit鞋面加近乎全掌式Boost中底設計，幾時着都一樣舒服過人。

查詢︰2730 0157（尖沙咀漢口道adidas旗艦店）、2789 8198（旺角豉油街adidas Megastore）