星戰聯名單品 陸續有來

英雄科幻片，長拍長有，近期《復仇者聯盟2：奧創紀元》全球票房大賣，連帶周邊產品同樣賺到笑 。而年尾12月《星戰7》又上畫，不過已經見有唔少聯乘產品出籠。例如同雪靴品牌UGG Australia推出嘅黑武士系列，今次以代表人物Darth Vader為主題，全部以黑色為主，呼應番黑武士嘅「黑暗原力」，當中紅色縫線和細節就凸顯黑武士內在神秘感，款式有齊高筒雪靴、低筒雪靴以至輕便鞋等等8款新品，家陣先5月，星戰迷望見可能都覺得熱。咁有冇第二樣揀呀？有！手錶品牌Nixon就會推出聯名錶款同配飾，同樣以「暗黑勢力」為主軸，並以星戰中四大角色Stormtrooper、Imperial Pilot、Boba Fett和Darth Vader為設計重心，相對就夠晒實用兼有型，不過暫時未知發售日期，有心買，唔怕等多陣啦。