2011年上架嘅超合金魂宇宙大帝，你有冇入貨先？平心而論，由造型到合體Gimmick，呢位大帝都可謂冇得輸，唯一挑剔嘅係可動性，唔係話佢弱，不過手腳關節始終未能拗盡，擺唔到招牌嘅拔劍甫士。不過又好難怪，既要分體、合體，又要顧埋分體嘅空雷王、海鳴王及陸震王都識郁，其實喺骨架及關節設計上都有好多製肘，況且強行將啲手腳亂咁扭，關節有咩差池，二千幾銀就咁報銷。今期上架嘅SR超合金宇宙大帝，實行甫士行先，大膽放棄合體元素，換嚟超高可動性。

Super Robot超合金《宇宙大帝》GodSigma 建議零售價：¥7,500

四肢嘅可動性都勝過超合金魂，擺甫士都零舍多花款。

面相雕功尚算精準，如果眼罩換成透明組件就更見精細。

配件唔算多，¥7,500嘅價位，抵唔抵玩就見仁見智。

SR版本嘅身形線條均勻得多，唔再肥仔Look。

膝頭後面有活動組件，屈腿時會連動收起，拜拜穿崩位。

腳掌內藏拉出式關節，增加紮馬時嘅接地性。

告別肥仔Look

被視為袖珍版超合金嘅SR超合金，一向以高可動性行先，宇宙大帝亦都一樣。冇咗合體元素，身形又縮晒水，高度只有14cm左右，不過唔代表型格指數跌晒Watt。由80年代初嘅POPY合金，到2011年嘅超合金魂，正正受合體所限，始終擺脫唔到肥仔Look，SR版本就冇呢個包袱，故此四肢以至軀幹嘅比例終於Fit番晒，四肢發達、胸肌澎湃，但係唔見咗水桶腰，十足Super Hero上身。至於塗裝方面用咗類似陶瓷烤漆做法，質感分外實淨，「含金量」亦見適中，骨架及關節等受力位都以Diecast製成，膝蓋兩側嘅外甲都係合金物料，都算有交代。

可動性贏晒

SR宇宙大帝嘅最大賣點，就係拍得住MG高達模型嘅高度可動性。宇宙大帝嘅必殺技係無雙劍，動畫中由背部嘅飛翼拔出劍柄，有番一定資歷嘅玩具迷，都會知道要將呢個甫士實體化，肩、肘及手腕都要有超高可動性，可惜由POPY到超合金魂都未能做到，依家終於由SR版本實現，後者嘅膊頭可以90゜舉起，手肘嘅屈曲幅度亦達90゜左右，襯埋專用嘅造型手掌，唔只做番成個甫士出嚟，甚至比起動畫場面更加有型！除此之外，膊頭關節又可以向前傾，雙手揸劍都做得到，膝頭後面又有活動組件，屈腿時會連動收起，增加活動幅度之餘又唔會穿崩，腳掌又內藏咗拉出式關節，增加接地性，故此論擺甫士能力，SR贏超合金魂唔只一個身位，況且價錢又相差咁遠，玩家自然可以放膽玩，甚至乎身形又細咁多，相信更易逃得過屋企嘅「海關」，即係母親或老婆大人嘅法眼吧！

查詢：2433 1828（瑞華行）