非常靠得住 Nissan Qashqai

雖然筆者嘅身高只有五呎多兩吋，不過揀車偏偏鍾意大大部，女生揀車同揀男朋友一樣，都要安全感嘛，相信唔少絲打都係同道中人。今次嘅長測對象Qashqai，雖然未至於Range Rover咁巨型，但係話晒都係SUV，身形都有番咁上下，起碼大部過同屬日產（Nissan）嘅Juke，況且比起大型SUV，Qashqai自然易操控得多，價錢亦都同樣易負擔。

Nissan Qashqai

輪圈尺碼有成19"，配合車身嘅肌肉線條，一個字形容晒︰Man！

車頂設有巨型天幕，將車廂與外間環境融為一體。

着偈唔使撻匙嘅，只需踩住迫力，按下Start Stop Engine鍵即可。

駕駛席設有電動調校功能，調校椅墊高度及椅背斜度，按鍵即可。

後排空間絕對交足貨，坐夠三位成年人都唔勉強。

多功能皮革軚環握感實在，而且按鍵就可控制音響及定速巡航。

2.0L直四引擎導入Twin VTC技術，有助提升燃油效率。

車尾嘅標準容量達430L，擺放兩件大行李後都仲有位剩。

行走於西貢嘅多彎山路，馬步依然穩打穩紮，當堂放心晒。

其實唔少人都問過筆者，究竟Qashqai點讀點發音先啱？如果學通勝用廣東話音譯嘅話，「Cash卡埃」都算係最接近，若果嫌撓口，索性簡稱做「QQ」，但凡識車之人都知你講緊乜。身為日系型號，原來Qashqai由設計到生產都係喺英國進行，唔怪得個Look咁破格，唔似一般日系車咁四平八穩，不過最抵讚都係易操控，而且穩定性可以媲美唔少Hatchback，加上車價只係$285,800起，有歐洲車嘅風味，但係出車門檻低過歐洲車咁多，所以諗得過！

試勻彎路高速公路

性能方面，Qashqai嘅2.0L直四引擎導入Twin VTC技術，可以因應車速而改變進排氣時間，配合Advanced XTRONIC CVT M-7波箱，加速爽快而傾向線性，既冇半點突兀之餘，仲可以幫手慳油。喺三日兩夜嘅試車過程中，頭一日就駛入多彎嘅西貢及下白泥，發現Qashqai嘅馬步比唔少同級SUV仲要穩陣，由減速、轉向到出彎都夠晒流暢，畀到駕駛者好大信心。第二日筆者要入機場一趟，途經高速公路，感覺到車速再快，車身都唔會飄浮不定，行車動態非常紮實。最後交車時一算，行咗440km，儀錶板顯示嘅平均耗油數字係13.9km/L，跟廠方公布嘅平均值14.5km/L相比，只係有4%差距，以目前油價計算，油費$1.1/km，算得上係錫住車主荷包。另一方面，雖然車身離地距比一般房車、揭背車為高，但係筆者咁細粒，進出車廂都唔覺有難度，尤其是A柱設計粗幼適中，轉大彎時可以睇到路壆，唔怕轉多咗挨埋壆，而且兩邊側鏡又夠大，更易掌握車身兩側嘅路面情況，而且就算冇後波鏡頭，只有後泊Sensor，但係單靠睇鏡去倒車、泊位，睇位都算係唔難（當然有埋後波鏡頭就Perfect啦）。

車廂布局體貼窩心

Qashqai得女生歡心嘅原因，唔只係造型以至操控都畀足安全感，而且相當體貼，雖然佢唔識噓寒問暖，但係置身車內，就會發現處處有心思。首先Qashqai預載咗Keyless Go無匙系統及按鈕式引擎起動系統，進出車廂以至啟動引擎，都唔使出動車匙，加上駕駛席設有電動調校功能，方便之至。其次波棍台尾部設有杯架，採用內嵌式設計，放入500ml水樽，樽身嘅凸出部分唔多，既唔易打翻，亦唔會妨礙波棍操作。另一方面，喺五座位布局下，車尾嘅標準置物量有430L，筆者第二日就靠晒Qashqai接載親友到機場，車尾放咗兩個大型行李後都仲有位剩；而後排空間亦有番咁上下，當時坐足三個成年人，兩男一女都冇投訴話逼夾，1,806mm嘅車身闊度，加埋平地台設計都值得畀Like。