小米4i 猜芳齡執靚樣

近年小米銳意建立「小米生活圈」，產品涵蓋手機、電視、Router同後備電，然而即使這樣，其最受注目產品依然係智能手機，廠方亦非常積極，新機一部接一部，近作就有將於5月12日中午12時開售的小米4i，售$1,599，卻有齊全高清屏幕、八核處理器、美顏「分唇」同埋好過癮的仿「How Old Do I Look」功能，自動幫你執靚芳容！加上今次毋須預訂，即日就買到，米粉們不用受「輪米」之苦了！

$1,599

發布會上只有黑、白、黃、天藍四色試玩，黑白兩色會率先推出。

前置500萬像素鏡頭支援80°廣角自拍。

喇叭對應Smart PA智能音樂技術，有助提升音質。

後置1,300萬像素鏡頭旁邊有雙色溫閃光燈。

兩個SIM卡槽都對應4G LTE，方便隨時轉換制式。

預載最新MIUI 6介面，並棄用App Drawer，開App夠直接方便。

系統能估計自拍者歲數，並加入最適合的美顏效果。

取景時可加入12款濾鏡，並可即時預覽效果。

屏幕懂得自動調節像素對比度，確保畫面清晰。

原廠有四色保護殼，發售日期待定。

小米4i上月尾於印度發表，定位中階，售價介乎小米4與紅米2之間，而且它是國際版本，香港有得賣，偏偏內地沒有。小米出名高性價比，屏幕一向有睇頭，小米4i亦不例外，用上5吋1,080p全高清屏幕，像素密度達441ppi，畫面鮮艷奪目；配合最新「陽光屏」技術，屏幕懂得因應環境調節像素對比度，黑位分外突出，睇人像相一流！講到相片，它分別搭載了1,300萬像素後置及500萬像素前置鏡頭，後置鏡頭支援F2大光圈、HDR及1,080p全高清錄影，而前置則對應80°廣角拍攝，聽落似乎不算特別，但玩過後就知道，原來自拍時會啟動類似「How Old Do I Look」的技術，估計被拍者年齡，並提供相應的美白及美瞳效果。現場模特兒就話系統好識氹人開心，逢人都報細數，難怪玩個不亦樂乎！

一體成型　五色機身

講番機身，沿用廠方最叻的一體成型設計，只不過今次棄用小米4的金屬用料，改以全塑膠，手感不如前代紮實，但就換來7.8mm的厚度、僅重130g，又輕又薄，握感舒適。另一改變係用色除有黑、白外，仲有黃、天藍及粉紅色選擇，清新到爆，至襯夏天。然而一體成型亦有缺點，例如無得換電及不可加裝記憶卡，本身都有3,120mAh電池頂住，勉強夠用日半，但無得加卡，僅靠16GB ROM，長遠來說一定不敷應用。

性能一般　搭通中港

大腦方面，小米4i用的是Snapdragon 615八核心處理器及2GB RAM，實測見運作不算暢順，多工下開Apps仲有少許窒，《AnTuTu》僅得24,170分就如實反映出問題。幸好，此機已「升呢」成Android 5.0系統，不用等升級，單係這一點就加番不少分數。特別一提，身為國產機，小米4i好自然支援雙卡雙待，其最大賣點係兼容五模十六頻，除FDD-LTE及TD-LTD港中兩地4G網絡外，連WCDMA及TD-CDMA都支援，一機就能搭通兩地3G及4G，頻段齊全，同價位之中無敵手。