Audi S4 3.0 TFSI quattro無可再挑剔

香港人揀車出名奄尖，最好部車似足「出奇蛋」朱古力，即係樣樣都要，可以一次過滿足多個願望；雖則四門房車依然係市場上嘅王道，不過有得揀，你都想部車個樣惡啲、性能好跑啲、車廂再Grand啲、實用性就千祈唔好差啲啲……Well，數嚟數去，除咗奧迪（Audi）S4，能夠Fulfil以上要求嘅車款又有幾多？

Audi S4 3.0 TFSI quattro

前排用咗高桶式跑化座椅，留意頭枕對落縫上S4字樣。

如果天窗面積再大一啲，咁就真係無懈可擊。

尾箱嘅標準空間達480L，足夠放置兩個大型行李篋。

後排足夠畀三位成年男士安坐，見出S4好玩之餘也不忘乘坐感受。

家族式嘅中控台布局，只要你有駕駛奧迪型號嘅經驗，一定好快上手。

鴨尾翼加四出式尾喉，跑格得嚟又唔過火。

頭泵把兩側加大咗入風口面積，切合跑格化嘅升級形象。

波棍台後方設有多組按鍵，Audi Drive Select及自動停車系統掣都伸手可及。

軚環背後設有加減波撥片，轉波話咁易。

S4選用MMI作為中樞系統，對應車內多項功能，利用中控台屏幕就能發出指令。

3.0 V6 TFSI特別注重中後段力度，愈跑愈有勁。

身為奧迪粉絲，就算未Check規格表又未撻偈，都會知道S-Model及RS-Model絕對唔係人咁品，辣者，唔只性能，仲有個Look。就以今次嘅S4 3.0 TFSI quattro為例，同A4一樣都係四門身段，但係形象好動得多，頭、尾泵把都係線條銳利分明嘅新設計，頭泵把兩側仲多咗蜂巢形入風口及霧燈，頭燈組又內藏LED日間行車光管，炯炯有神；尾泵把追加擾流器，又有四出式尾喉之餘，尾冚仲多咗鴨尾翼，尺寸啱啱好，動感之餘唔會太過火，切合番四門車應有嘅斯文本色。至於18吋五幅式合金輪圈，就令S4更具台型。

前排布局特別有Feel

講到S4周身刀張張利，車廂當然唔失禮，空間感與A4無異，不過設備當然有Upgrade，前排就改用S Line高桶式座椅，加強對身體兩側嘅支撐度，高速攻彎都唔會晃來晃去，而後排嘅三座位布局，絕對唔係雙座扮三座，加埋充足嘅Head Room與Leg Room，坐足三位成年男士都唔覺勉強。另一方面，既然係高性能嘅S-Model，換上平底嘅跑化軚環當然合情合理，而大面積嘅波棍台用上銀色面板，就比A4更具豪氣，筆者最Like係中控台上嘅MMI控制系統，包攬車內多項設備之餘，而且位置就手，做到User Friendly。

懸掛實淨攻彎利落

S4有外形有空間，不過講到底，始終性能先係最重要！3.0L V6 TFSI引擎果然冇令人失望，馬力與扭力分別高達333hp及44.6kgm，傳動系統同樣高規格，用上七前速S tronic自動波，配合只有1,705kg嘅車重，起步反應夠狠夠勁，Turbo喺轉數早段已經介入，力度唔算太猛，唔會嚇親人，繼而中段起嘅力量湧現就更為豐厚，再度提升加速威力。另一方面，S4採用跑化懸掛，有別於斯文嘅A4，所以過彎時更加實淨、穩定，指向性亦加倍準確，就似着住西裝嘅運動健將般，不動則已，一郁起嚟零舍快過人、敏捷過人。