身為《Monster Hunter》嘅超級粉絲，誓必與龍為敵，直頭誓不兩立，唔係你死就係我亡，但係你又有冇諗過，獵人同獵物都可融為一體，仲要識變形？除咗出Game，其實「芒亨」都出過唔少扭蛋、Figure，估唔到係Bandai「食神」上身，將芒亨同超合金撈埋一齊，推出咗「Monster Hunter×超合金G級變形雄火龍」（G-Rank Henkei Liolaeus），原本嘅屠龍者，竟然可以變成天敵雄火龍，出位指數仲高過瀨尿牛丸！

Monster Hunter×Chogokin G-Rank Henkei Liolaeus　建議零售價：$899.9

由造型到可動性，呢款超合金芒亨都相當有水準，不過無論片手劍與大盾都實在太大太重，都幾難舉得起。

龍頭造型夠細緻，龍口仲可以打開，夠晒兇神惡煞。

主要嘅關節位都用合金打造，當中包括手肘嘅雙關節。

手腕由多組關節合組而成，甚至可以向內大幅度屈曲。

點只高達、變形金剛，依家連芒亨都識變身，合金版可以由獵人變成雄火龍，後者造型仲夠晒惡，不比電玩設定遜色。

打芒亨，機迷都掛住幫獵人嘅護具、武器升級，超合金版本嘅片手劍就可與大盾結合，變成攻守合一嘅大劍。

隨盒附有專用底座，印上超合金40周年及芒亨10周年嘅字樣。

Ka畫完高達畫獵人

無論你係80後或90後，只要鍾意打機，都好難逃得過芒亨嘅魔掌吧！不經不覺，芒亨系列喺去年踏入10周年，同年仲係超合金系列面世40周年，Bandai於是靈機一觸，將兩者扯埋一齊，推出咗呢款新品。造型方面，以電玩中嘅男獵人，以及Game中最具代表性嘅雄火龍為藍本，最出位係加入變形元素，可以由獵人變成雄火龍，反之亦然，相信再Die Hard嘅芒亨粉絲，都估唔到有此一着；另一估你唔到嘅招數，就係呢款新品嘅造型設計，交由機械設定大師、炮製過無數高達造型嘅「Katoki Hajime」（カトキハジメ/角木肇）負責，故此無論獵人或雄火龍形態，都充滿科幻味道，與電玩中嘅「古代」風格截然不同。

金屬塗裝跌晒Watt

設計意念夠晒出位，實際攞上手試玩過後，感覺又如何？首先造型方面的確出色，高約150mm嘅獵人狀態夠晒重裝效果，變身長約260mm嘅雄火龍亦顯得惡形惡相，仲有幾分索斯機械獸（Zoids）嘅感覺，「Ka signature」果然功力深厚，雙造型都交足貨，美中不足係早前廠方發表嘅官圖，以至公開展出嘅試辦，紅色部分都有好重嘅金屬塗裝效果，如今正式推出量產版，Metal Feel弱咗好多。另一方面，既然掛上「超合金」嘅牌頭，主體當然要有合金成分，就以獵人形態為例，包括腰、髖、手肘及足踝等主要關節位，以及軀幹和腳掌都以金屬製成，都算足料，故此即使將刀手劍與大盾掛喺背脊，唔用Stand都企得穩，不過由於劍、盾都又重又大件，想拎上手擺大動作甫士，純屬塑膠製成嘅肩位及手腕Ball Joint都未必夠力Hold得住，大家Set甫士時要畀多少少耐性了。

查詢︰2433 1828（瑞華行）