今屆NBA終於嚟到季後賽階段，唔只球星，就連各大運動品牌都趁住呢個黃金檔期，更加落力畀「顏色」對手睇，好似Under Armour Curry 1，今期就加推咗黑色迷彩版本「MI30」，鞋面、鞋櫳以至中底都以黑、灰作為主色，而外底就用上白色，成個配色變得深沉咗、內斂咗，唔似之前嘅「Home」及「Candy Reign」等咁鮮艷、佻脫，都啱嘅，嚟到季後賽，每場波都要步步為營，當正決賽嚟打，呢種心態上嘅轉變，正好展現喺新配色之上。除此之外，鞋舌正面有「4>1」嘅標誌，設計概念源自季後賽賽制，當中設有四輪賽事，而每輪都採用七戰四勝制，「4>1」就展示出Stephen Curry渴望一路平川，以破竹之勢問鼎總冠軍出線嘅心願，而鞋帶仲印有「MMTB」（Make My Team Better）及「LEAD」嘅字樣，說明想贏波，唔只要自己努力，仲要成隊一條心，有Heart指數爆晒燈！

Under Armour Curry 1 MI30 $1,049

鞋舌正面嘅「4>1」標誌，說明Curry嘅心願，就係於連闖季後賽嘅四輪賽事，直入決賽攞冠軍。

鞋尾嘅TPU罩形穩定裝置，刻有既似「30」，又似「SC」嘅Stephen Curry標誌。

外底採用多向性魚骨紋布局，抓地之餘，而且轉向靈活。