太極好唱得齊齊試e-Golf

要約齊太極樂隊做訪問，簡直係高難度挑戰，今次全靠e-Golf出馬，先至夾到太極六子睇車、試車兼做訪問，雖然仲係差兩位先齊人，但係有雷有暉（Patrick）、鄧建明（Joey）、劉賢德（Ernest）、唐奕聰（Gary）及盛旦華（Edde）等五子同場聚首，已經好難得。我要真……心話，呢五位既愛音樂又愛車嘅大細路，老老實實對e-Golf又點評價？

電動馬達嘅扭力數值有成27.5m，起步點會慢？

整合於頭泵把嘅C形日間行車燈，係Volkswagen純電動車款嘅獨有標誌。

錶板不設轉數計，取而代之係功率錶。

車內已經預載咗Discover Pro資訊娛樂系統，屬於標準配置，不另收費。

車廂布局與汽油版相若，軚環就係多功能皮革款式。

融入氣動力設計嘅新款16" Astana鋁合金輪圈，有姿勢有實際。

制動能量回收系統分為D1、D2、D3及B四個等級，主要透過波棍控制，B模式嘅能量回收效果最高。

Patrick「電動馬達夾EQ 270波箱，馬力及扭力都好夠用，喺香港揸實在夠晒有餘。」

Joey「我都算生得高，不過坐後排都唔會頂頭頂腳喎！」

Gary「原廠CCS快速充電系統，半個鐘叉到八成電，一個字︰『快』!」

Edde「叉一次電，就行到190km，夠我由西貢來回伊館幾轉。」

Ernest「木結他話大唔大，話細唔細，不過個尾箱照樣放得落。」

太極即將於五月底喺紅館舉行「The Mega Hit」30周年演唱會，每次提起太極，第一時間總係諗起《紅色跑車》，呢啲就係Mega Hit囉，至於啱啱抵港嘅e-Golf，標榜零耗油、全電動，亦係車壇嘅Mega Hit，兩者惺惺相惜，有冇火花擦得出先？

識得玩梗係玩歐洲車

顧名思義，e-Golf係以五門揭背版嘅Golf為設計藍本，車廂空間同現時嘅汽油版相若，難得嘅係唔會為咗預留位置放電池而犧牲車廂空間。第一次見到e Golf實物，Edde同Gary就表示：「啱啱出道嗰陣，後生仔要型，個個都係揸日本車，之後年紀漸長，就陸續轉揸歐洲車，無可否認歐洲車的確鋼水好啲、實淨啲，坐落都舒服啲。」Joey就話：「Golf嘅賣相向來討好，我之前都有留意呢部車，家陣出埋電動版，又多一個選擇。」Patrick接住講：「車頭嗰條藍邊，由鬼面罩向兩邊LED頭燈伸落去，頭泵把又有C字形日間行車燈，低風阻車身襯埋Astana輪圈，個樣夠晒動感。」話口未完，由車廂鑽番出嚟嘅Ernest都話：「由Discover Pro資訊娛樂系統、車廂加熱及冷氣功能，仲有加熱擋風玻璃都係標準裝備喎！」

夠長氣多種充電方式

五子就同你我他一般車主一樣，都認同油費係養車嘅一大開支，轉揸電動車，自然慳番唔少，而滿電狀態下嘅e-Golf，續航距離長達190km，就算打個七折都有130km，而每100km嘅耗能數字只係12.7kWh，即係電費開支只需$0.14/km，Ernest聽到即刻好興奮：「咁平！放假同家人去遠一點，遊吓車河，諗起都開心！」不過Joey就擔心：「行電係平，但係點幫部車充電？充電又要幾耐先？」e-Golf採用24.2kWh鋰離子電池，可以用多種方式Plug-in充電，就以標準充電模式為例，使用2.3kW交流電，叉足100%就要13個鐘，等唔切？改用原廠CCS快速充電系統，使用40kW直流電，只需半個鐘就可叉番80%儲電量，Patrick笑笑口話：「如果將來研究到車用尿袋，咁就仲方便。」

堅好力保養做到足

講番認真先，睇嚟Edde心郁郁想出車喎，佢透露：「睇完車、試完車，覺得部車好正，以前已經好想買部電動車，一嚟環保，二嚟唔使入油，充電就得，電動車又可以豁免首次登記稅，車價唔使$37萬，的確令人心郁。」未算，環保、抵買之餘，e-Golf仲好夠力，佢嘅電動馬達可輸出115ps馬力及27.5kgm扭力，馬達轉速可以升至12,000rpm，配合全新嘅單速波箱（EQ 270），0-100km/h只需4.2秒，太極五子都異口同聲表示：「喺香港揸，夠用有餘啦！」不過去到採訪尾段，Patrick及Enrest擔心高壓電池嘅保養問題，Don't Worry，原廠提供五年或100,000km保養，而且特別為電動車度身訂造保養計劃，為高壓電池提供八年或160,000km保用，又為新車主提供「e-Golf Orientation」課程，包括性能特點介紹、使用貼士及維修保養指南等，吸引指數點會低過《紅色跑車》呀！