Remix OS×Tablet 香港有「腦」

依家市面上嘅Tablet產品，離不開iOS、Android及Windows三大作業系統，勢估唔到竟然有品牌敢於開發全新OS！佢就係剛推出嘅Remix Ultra-Tablet，驟眼睇同一般11.6吋平板電腦冇咩分別，特別在採用自家研發嘅Remix OS，集Android、Windows嘅特點於一身，用落都幾方便同順手；最有噱頭係原來產品硬件及OS均出自香港人手筆，撐得過！

插上實體鍵盤之後，即時變身一部Laptop，另支援Windows常用的快捷鍵，做文書工作一流。

設有Kickstand兩段式支架，方便將機身擺放於平面。

機側設有喇叭，音量輸出都唔錯。

機側備有microUSB，另附送OTG轉頭，可以接駁其他USB裝置。

採用Nvidia處理器，跑分、操作都有唔錯效果。

於通知中心頁面橫掃，即轉至快捷功能頁面，可以設定Wi-Fi、屏幕旋轉等常用功能。

內置Google Play，兼容所有Android Apps。

主頁同Android、iOS相似，唯一唔同係左下角有Windows式Task Bar。

長按空白位置即可轉換Wallpaper，不過就唔支援Widgets。

鍵盤安裝方便，而且一插即用，唔使任何設定。

Jide Technology其中兩位創辦人陸韻晟（右）及周哲（左）。

講起Remix Ultra-Tablet、Remix OS以至產品所屬嘅Jide Technology公司，大家可能會有點陌生；此公司係由周哲、陸韻晟、高恆三位前Google工程師喺2014年於北京創立，而Remix Ultra-Tablet、Remix OS作業系統正係旗下嘅出品。三位之所以研發Remix Ultra-Tablet以及Remix OS，原來係想製作一部集Android以及Windows優點、兼可以令用家易於使用嘅平板電腦，勁有理想。依家Remix Ultra-Tablet已經可以上內地購物網站「京東商城」（JD.com）買到，定價2,688元人民幣；而香港定價就係$2,999，價位上夠晒競爭力。香港買家暫時可以透過廠方網址連結到Kickstarter購買，稍後就可以去返廠方網址直接購買。

機體紮實手工上乘

第一眼睇Remix Ultra-Tablet，確實有幾分似Microsoft Surface系列，皆因佢同Surface一樣喺機背加設一個金屬支架，能以大約40°及80°兩段式擺放於枱面，再加上跟機附送一個以磁力吸附機身，並設有Touchpad嘅實體鍵盤保護蓋，隨時會誤以為係一部Surface。先撇開設計不談，此平板手工相當唔錯，機身紮實不在話下，機背、Kickstand支架都用上鋁合金，而機側音量鍵、開關鍵、耳筒插口仲特意加入拋光銀色圍邊，細節位都做到足。值得一讚係個實體鍵盤保護蓋，雖然只係附送產品，不過仍誠意十足，將磁石連接位拍埋機身就即時用得，按鍵回彈力不俗之餘，Touchpad仲支援雙指操作，質素媲美大廠出品。對外連接方面，除機背microSD卡槽外，僅得機側一個microUSB插口，可以為機身充電之餘，跟機送埋一個OTG配件，方便大家連接滑鼠、手指等配件，而且廠方講到明USB仲可以玩雙向充電，換言之必要時可以用Remix Ultra-Tablet幫手機充電，加上內置8,100mAh超大電池，包餵得飽！

心思軟件集多方優點

軟件方面當然都係重點，平板所預載嘅Remix OS 1.0版本作業系統其實係建基於Android 4.4之上。話就話係新系統，不過介面整體布局同Android都好似，向上掃可解鎖頁面，另有圖像介面、虛擬返回鍵、Home鍵以及下拉嘅通知中心，用開Android、iOS裝置應該唔難上手；而且內置埋Google Play，亦全面支援所有Android Apps，用Gmail、YouTube等Google一系列服務都冇問題。

Remix OS同Android最大分別在於頁面左右下角加入咗一條Windows式嘅Task Bar，左下角除設有返回、Home鍵之外，亦會顯示開啟中嘅Apps圖示，方便用家隨時切換程式之餘，仲可將指定Apps拉至Task Bar變成Shortcut。而右下角有個應用程式功能鍵，一般情況下會顯示系統剩餘記憶體，亦可清除暫存記憶體，當用家正在開啟程式時，右下角就會提供「手機模式」、「全螢幕模式」等選項，前者特別針對Play入面嘅手機Apps，皆因一般Android平板都將所有Apps以全螢幕形式顯示，撞正為手機而設嘅Apps，畫面就會撐到起晒格兼移晒位；「手機模式」就會將Apps畫面縮細到同手機畫面一樣大，睇得更舒服。順帶一提，用家只要於通知中心向橫掃就會顯示快捷功能頁面，頁面似足Windows嘅Metro UI，可以調校Wi-Fi、屏幕亮度等設定，相當就手。

創辦人有Say

為何Jide Technology三位創辦人會有研發新產品的念頭？其中兩位創辦人陸韻晟及周哲表示：「屋企人需要添置Laptop，當時市場只有Windows 8平台嘅產品，需要自己Downgrade改裝較好用嘅Windows 7作業系統，於是就萌生將Windows 7嘅使用體驗放入Android作業系統嘅想法。研發圖像介面不難，大概三個月就完成初步改動，六至九個月已能做出Demo版本，當時已能運行70% Android應用程式。最困難係部分應用程式內容編寫較為紊亂，當中以內地開發商為甚，要100%兼容就極有難度」。無疑，近年平板電腦市場開始放緩，但他倆指出：「10吋以上平板市場仍有雙位數字增長，而Remix OS正正是針對較大尺寸、如9吋以上平板而設計。Ultra-Tablet本身定位較接近手提電腦，仲配備實體鍵盤保護蓋，而且定價便宜。我哋計劃跟其他廠商合作推廣Remix OS，如配合Smart Monitor嘅Remix OS Desktop，售價可低至250美元之內。」