「巴神」巴洛迪利（Mario Balotelli），實在同神一樣咁神秘、咁難估，明明速度身形腳法體能瓣瓣兼備，偏偏呢幾年都踢唔出最佳水準；成25歲人都未識諗，唔夠心理質素？但係佢無論喺國家隊或球會，都係最穩陣嘅12碼劊子手，幾乎例不虛發。身為佢好拍檔之一嘅PUMA，最近就為佢設計咗專屬嘅新波Boot—evoACCURACY "MB45"，顧名思義，以提升準確度為大前提，咁搞法，巴神射12碼咪變得更加屈機？

PUMA evoACCURACY FG$1,899

evoACCURACY嘅用色鮮艷大膽，切合晒巴神嘅出位性格。

整個鞋身嘅前段及中段都內藏AccuFoam，提升整個前掌嘅控球及射門準確度外，菱形壓紋防止AccrFoam變樣走位，增加耐用性。

有效加強射門力度嘅GSF鞋底設計，原原本本由evoPOWER移植到evoACCURACY身上。

鞋舌都加咗泡棉Pad位，索緊鞋帶後都唔會對腳背構成壓力。

外底物料係Pebax，唔只夠輕，而且有好大嘅屈曲幅度，有助加強GSF嘅赤足效果。

鞋面嘅綠色位置加咗GripTex 3D紋理，水戰時有助減少控甩腳嘅機會。

巴神早前喺「謝拉特隊VS加歷查隊」嘅紀念賽上，一傳一射盡顯功架，係囉專心踢波咪幾好囉，掌聲返晒嚟。

自從巴神由剔牌變投美洲豹之後，就一直係evoPOWER嘅頭號用家，evoACCURACY就係由evoPOWER演變而來。針對巴神嘅獨特球風，evoACCURACY除咗有evoPOWER嘅力的表現，更着重提升球感，藉此增加射門準繩度。

準確才是王道

首先，原本evoPOWER嘅鞋頭已經有唔少方塊形嘅AccuFoam泡棉Pad位；AccuFoam具有卸力、回彈快嘅特點，又可加強鞋面與足球嘅摩擦效果，令用家可以更流暢、準確地完成First Touch繼而射門嘅整套動作。evoACCURACY就刪除方塊形嘅布局，改為將整個鞋面嘅前段及中段都內藏AccuFoam，控球區比evoPOWER大得多，無論用腳背正射、鞋頭篤射、腳內側盪射或腳外側落篩，都可發揮作用。另一方面，為免AccuFoam變形走樣，故此將鞋身前半段壓印上菱形Pattern，而且綠色位置更加入GripTex 3D紋理，後者即使在天雨之下，都可加強鞋面與足球嘅摩擦力。筆者覺得最感窩心嘅地方，係evoACCURACY嘅鞋面雖然用合成物料製成，但唔似一般合成物料咁硬身、局促，反之柔軟度與觸感，都似足真皮咁貼服，唔只有助提高球感，仲分外舒服。

繼續大大力

另一方面，evoACCURACY沿用咗evoPOWER嘅GSF彈性穩定支撐系統，原理係赤足狀態之下，射門時腳掌唔只會蹬直，仲會微微向內彎、腳背稍稍拱起，但係如果鞋底用料欠彈性，就會限制咗腳掌嘅彎曲幅度，令射門力量打折扣；位於鞋底後半段嘅GSF魚骨形布局，正好讓鞋底能夠自然屈曲，令整個鞋形緊隨腳形而變，就似赤足一樣，令射門力量完完全全傳遞到足球之上。有咗呢對新Boot，照計射門Keep住大大力之餘，仲可以更加準確，PUMA對你都算夠晒義氣啦，巴神大人，拜託你生生性性，專心踢波，幫到利物浦入前四，「肯肯定」大把人錫晒你，最起碼我隔籬位嘅同事就講到出口！

查詢：2398 0004（SFALO）、2834 3821（PUMA）