LG Spirit 靚料入門價

入門級手機向來以價格取勝，但賣相就預咗比較大路。近年設計大獲好評嘅LG，就話連入門機仔都要以靚行先，示範作就係Spirit。此機定價千四蚊有找，擺明係入門，但竟然用上金屬髮絲背、弧形流線機身，唔講仲以為係旗艦機；而且仲備有四核心處理器、Android 5.0、Knock Code等功能，呢個價位嚟講好抵玩。

機身備有4.7吋屏幕，而且邊框都幾窄。$1,398

內置《Glance View》，由頂向下一掃即可顯示時間等資料。

備有Rear Key背鍵，熄芒待機時長按「音量-」即可啟動相機，長按「音量+」則可開啟《QuickMemo+》。

兩個卡槽均用上microSIM，另支援microSD擴充容量。

電池容量僅得2,100mAh，未必夠撐一日。

採用弧形機背，手感非常好。

換上Android 5.0作業系統，介面清晰簡潔。

拉下狀態欄即可隨時更換主卡，非常方便。

「雙智能卡」可以設定數據使用的主卡及顏色主題等。

支援Knock Code，可以用特定的敲芒次序作解鎖方法。

內置《QuickMemo+》，方便記事、畫畫。

近期LG大熱手機相信非G Flex 2莫屬，佢個曲面芒除咗夠噱頭，手感仲零舍好。依家想享受弧形手感，就可以揀Spirit，雖然此機並非採用曲芒，不過就有個流線型曲背，令手感大大提升；再配合廠方近年招牌Rear Key背鍵，可以調校音量或者影相時當快門鍵，單手操作超方便。機身備有黑、白兩色，當中以黑色較為特別，實物其實比較近似灰色，機背殼表面帶有光澤之餘，仲加入金屬髮絲紋，感覺高檔，完全唔似一般入門機咁薯嘜。至於屏幕就係4.7吋，解像度僅得1,280×720，不過就用上IPS技術，清晰有保證。

具備旗艦功能

規格方面，Spirit內置入門級四核心處理器以及1GB RAM，效能唔算好強，但就換上最新Android 5.0 Lollipop作業系統，操作亦未見窒機。另外亦支援雙卡雙待功能，除咗狀態欄設有換SIM選項外，用家亦可選擇於虛擬功能鍵上加設一個雙卡轉換鍵，方便隨時更換主卡；而且兩個卡槽均支援3G網絡，換主卡上網時都唔使特登將SIM卡換位，功能貼心。不得不提，Spirit移植咗大量旗艦機功能，包括《Gesture Shot》手勢自拍，自拍時只要將手掌握緊成拳頭就可以倒數；而《Glance View》喺屏幕關閉待機時，於屏幕頂以手指向下掃，即可顯示時間、訊息及未接來電等資訊，唔使次次着芒咁嘥電。