成日話鍾意做運動嘅女生，起碼加10分，就喺啱啱過去嘅星期六，有多達三千名女生齊齊加分喇！「2015 NIKE WOMEN女子路跑系列比賽」香港站，就喺當日於啟德郵輪碼頭一帶舉行，吸引咗大約三千名跑步女將參加，有冇你份先？而且有得跑，又點會少得「肯亞徐」徐濠縈嗰份！

NIKE首度在港舉行嘅女子10K長跑比賽，吸引咗三千名女生參加，場面夠晒熱鬧。

Summer（左）與Kazel（右）都對今次嘅大會安排讚不絕口，尤其是影相區與化妝區等服務，夠體貼！

大會喺終點區安排咗多位型男，歡迎各位凱旋而歸嘅參賽者，佢哋仲High到抱起阿徐合照。

哪個女生不愛美？大會特設化妝區，讓女生賽後執靚靚離開。

賽後特設伸展運動環節，由專業教練帶領，讓參賽者Cool Down，好好調整狀態。

本地長跑天后姚潔貞，以大熱姿態成為衝線第一人，她於賽後訪問表示，以贏得奧運參賽資格為今年目標。

2015 NIKE WOMEN女子路跑系列比賽係全球最大規模、專為女生打造嘅路跑活動，舉行城市多達20個，而香港就係繼阿姆斯特丹、柏林、廣州之後嘅第四站，賽程10km，以啟德郵輪碼頭為起點，之後經過承豐道及觀塘海濱花園，再折返碼頭為終點；連半馬、全馬都跑得掂嘅阿徐，今次嘅10K又點會難倒佢！根據大會時間，佢就以49分49秒衝線，聽聞仲係佢嘅最佳10K成績。

長跑天后大熱奪冠

至於跑第一嘅係本地長跑天后姚潔貞，今次係佢第一次到九龍東比賽，覺得氣候與場地安排都好理想，至於個人表現方面，她說︰「覺得自己可以再跑快一點，因為原本預計可以35分鐘左右完成賽事，結果慢了少許。我很欣賞今次的場地安排，有很多螢光的布景裝置，吸引大家拍照留念，尤其是賽後有Massage服務，對女生而言，如果平時沒有常常練跑的話，比賽後接受Massage有很大幫助。至於個人目標方面，我將會於五月參賽，希望在今年內爭取到參加奧運馬拉松項目賽事的資格。」

超體貼賽後服務

今次路跑唔止係長跑比賽，仲係一個女生Party，因為場內有好多窩心設施，包括形形色色嘅影相區，畀各位女生盡情Selfie；又有伸展運動區，由專業教練同大家一齊拉筋，等大家跑完之後，聽朝起身都唔會嗌攰嗌痛；至於Massage區就有專人幫你鬆弛肌肉，即時叉足電；最體貼係有埋化妝區，幫各位跑完之後執番靚個妝，唔會滿頭大汗溶晒妝失禮人前。身為參賽者嘅Summer及Kazel，都好欣賞今次嘅比賽安排，Summer說︰「我第一次嚟啟德碼頭跑步，無論氣氛、場地布置與氣候都相當好，只嫌部分路段窄咗啲，難以加速上前。」Kazel則說︰「今次比賽只接受女生報名，對女生嚟講會公平一啲，因為男生始終體能佔優，男女一齊比賽嘅話，男生往往會跑喺前面，對我哋構成壓力，今次比賽就公平得多、輕鬆得多。」不過話時話，NIKE唔使為公平而專登搞多個男子賽，係都男女一齊跑啦，我哋男生好大量嘅……真正原因係，相信各位爸打對於「男子賽」唔會有太大興趣啩！