容積Downsizing與加裝Turbo，已成為目前車壇嘅主潮流，能夠兼顧節能與高性能要求，技術層次又唔似Hybrid、電動或生物燃料咁高，雷諾（Renault）亦深明此道，於是為Clio加推嘅GT 120 EDC，採用1.2L直四Turbo引擎，換嚟不成正比、令人驚喜嘅120hp馬力，而平均耗油量可低至5.2L/100km，唔到你唔服！

Renault Clio GT 120 EDC

Clio GT 120 EDC全長只有4,077mm，車身小巧，攻彎也分外靈巧。

車廂布局充滿跑味，GT版本嘅三幅式皮革軚環可見一斑。

三組儀錶以不規則形狀排列，車速顯示屏置於正中央。

按鍵啟動R.S. Drive駕駛模式，引擎與波箱反應變得更為敏銳。

車尾環境即時傳送到中控台屏幕，倒車、泊位毋須靠估。

R-Sound Effect可以模擬出多種引擎音效，屬於Clio GT 120 EDC嘅標準功能，不另收費。

雖然容積只有1.2L，但透過Turbo發功，可以發揮出超越同級嘅120hp馬力。

前排採用跑車化桶椅，頭枕繡有GT版本嘅專屬徽章。

輪圈選用17"跑車化款式，而頭泵把兩端加入LED日間行車燈。

2,589mm軸距造就寬敞嘅後排空間，而且三個座位都有獨立頭枕，並非每款同級車都做到。

心水清嘅車迷，可能知道同為1.2L級別，但Clio除咗有GT 120 EDC，仲有專為英國市場而設嘅16V 75，兩者相比，由於前者有Turbo支援，馬力足足多咗45hp，扭力亦高達19.4kgm，絕對應付到香港嘅路面環境，而且耗油量可低至5.2L/100km，計落油費只係$0.8/km左右，更加容易討好香港車迷。

雙離合器EDC 反應快

至於波箱規格係六前速EDC自動波，藉雙離合器設計帶嚟敏銳嘅轉檔反應，確保引擎轉速時刻保持於最強輸出範圍內。今次試車就喺路況迂迴嘅新娘潭路進行，筆者沿途不停拉動軚環撥片切換波檔，同時踩盡油門出彎，每當引擎轉速超過2,000rpm，19.4kgm峰值扭力都即時到位，同時用埋R.S. Drive駕駛模式，加速更見凌厲。

Clio GT 120 EDC嘅底盤設定同樣出色，以前麥花臣、後扭力桿組合而成嘅懸掛組合，攻彎時為車體帶來充分支撐，加上車長只有4,077mm，以大美督至涌尾嘅連續彎路表現而言，全程做到靈巧精準。

跑格裝潢 遍布內外

至於車身方面，Clio GT 120 EDC加裝咗大量Renault Sport配件，包括特別設計嘅頭尾泵把、17"專用輪圈及高置式尾翼等， 將Hothatch應有嘅小鋼炮形象盡現眼前。車廂裝潢亦極具跑格，軚環換上GT專用款式，乘客席前方貼有Renault Sport徽章，結合集多功能於一身嘅R-Link多媒體系統，型格與實用並重，最過癮係R-Sound Effect可以模擬出多種引擎聲效，令駕駛更添玩味。至於筆者最沉醉嘅都係前排賽車化桶椅，每連攻彎時，對腰間提供強力支撐，彎位再急再多，都可穩定坐姿，令駕駛者集中精神應付前路。

SPEC

車型：五門五座位揭背車

引擎：直四Turbo

容積：1,197c.c.

最大馬力：120hp/4,900rpm

最大扭力：19.4kgm/2,000rpm

懸掛：（前）麥花臣 （後）扭力桿

驅動：前置引擎、前輪驅動

傳動：六前速EDC雙離合器自動波附加減波功能

輪胎：（前/後）205/45 R17

車身體積：4,077×1,945×1,441mm（長×闊×高）

平均耗油量：5.2L/100km

售價：$199,800

查詢：2927 3538（維信汽車）