1996年嘅NBA All-Star Game，至今仍被球迷捧為經典，當年東岸有Michael Jordan、Pippen及Penny，西岸就有Malone、Stockton及Barkley，計牌面，已經勝過依家面目模糊兼Hea打嘅「全明星」多多聲！出開NBA Action Figure嘅Enterbay，就趁品牌成立10周年之際，推出限量版1/6 All-Star Michael Jordan慶祝一番，裏裏外外都有極高水準，難怪兩位星級籃球狂迷—喬靖夫與H都齊聲讚好。

同樣捧MJ為神級偶像的人氣小說家喬靖夫（左），還有波鞋達人H（右），都對今次的All-Star MJ Figure讚不絕口。

首次出咆哮表情頭雕，喬老大都話似︰「始終伸脷樣太滑稽，今次個樣兇得嚟又有神，仲好！」

包裝盒都係重新設計，靚成咁叫人點捨得丟？

香港分得1,000套，激罕，每盒仲有編號證書，唔使問阿貴當然以「23/3000」最值錢。

波衫像真度高，並同時改良咗布料，質地更貼服自然。

全白AJ 11，呢對神物嘅真身，有錢都未必買到，1/6版本或者可以令AJ狂迷望梅止渴。

佐敦當年勇奪MVP，呢個獎座梗係要跟埋啦！

飛走公牛標誌，圓形地台改印1996年聖安東尼奧明星賽Logo，收藏價值更高。

售價︰$2,088

粉絲有Say
波鞋達人H話對鞋激似︰全白11代配湖水綠波衫係超襯嘅事，好多謝Enterbay將佢還原出嚟。

喬老大最Like件波衫︰︰圖案同隻色最似，亦係我心目中最理想嘅All-Star版本。

十年人事幾翻新，Enterbay亦然，就喺過去10年內，就由一間專做李小龍等本土角色嘅Figure公司，搖身一變成為NBA Masterpiece嘅生產基地，作品蜚聲國際，當中轉捩點係2013年攞到Michael Jordan「拉臣」一役。事隔兩年，45號、The Last Shot及1/4等版本嘅MJ都先後出過，想Keep住新鮮感，向All-Star發展係不二之選，對於今次嘅96年All-Star版本，喬老大第一個讚好：「嗰屆除咗多球星，最重要係佐敦復出後嘅第一屆明星賽，當時佢已經33歲，一樣可以砌低班後生仔攞MVP，對佢、對Fans嚟講都好有紀念價值。」

怒吼遠勝伸脷

今次嘅Figure高約13"，全身有30幾個關節，並且首度採用怒吼表情，H睇過實物後表示：「雖然Enterbay之前都出過兩個表情，但係都較為靜態，大家期待佢出擘大口之餘，又怕效果太卡通。依家睇到實物感覺好像真，記憶中佐敦剷籃時應該就係咁樣。」喬老大補充：「雖然我都想佢出伸脷版，但諗深一層，佐敦打波都唔會無時無刻伸脷，而且咁出個樣太滑稽，依家呢個樣更兇更有神，個人認為頭雕已去到雕塑級數。」

AJ 11似到足

Figure另一亮點就係波衫，由於當年比賽喺聖安東尼奧舉行，辣椒就係當地特色食品，所以波衫設計以辣椒為主題，湖水綠球衣正面印有辣椒圖案，設計搶眼生動，唔少籃球迷都選為All-Star歷史中最靚嘅波衫。喬老大睇過今次嘅Figure實物後指出︰「聖安東尼奧配色好出名，籃球迷都好期待，Figure件衫都算做得忠於原著，最矚目仲係對全白色AJ 11，去年復刻已經勁多人搶，我都有一對，就咁睇Figure版嘅AJ 11都做得好Detail、好細緻，值得欣賞。」配件方面，打底褲、護肘護膝及磁石波都係基本配套，隨盒跟埋All-Star MVP獎座及明星賽別注地台。窩心提示，呢款Figure全球限量3,000套，香港只有1,000套配額，仲要上網抽籤先買到，加埋編號證書，分分鐘比滙豐35連張仲難抽呀！

訂購小資料

方法︰非會員可於4月8日至12日參與網上抽籤，登記時間為該日早上10正至晚上11時59分，所有中籤者將於該輪登記時間後翌日中午前收到確認電郵通知。成功中籤嘅買家，除咗買到明星賽MJ Figure，仲可獲得換領卡一張，日後憑卡可以換取Pippen或Penny於同屆明星賽嘅球衣連短褲一套，方便大家重組96年東岸明星隊。

訂購網址︰goo.gl/forms/EW7OOVcs61　

查詢︰ 2332 3615