Q版機械人Figure一向大有市場，不過出嚟出去，始終畀人「小童向」嘅感覺，得意有餘而精細不足。唔知係唔係受到Kids Logic嘅Iron Man，以及ES合金嘅超級系機械人影響，就連Bandai都決定將Q版機械人走精緻化，去年尾推出NXEDGE STYLE系列，無論係第一炮嘅Strike Freedom Gundam，以及之後嘅帝皇萬能俠及Destiny Gundam，都堪稱係同款Q版作品中最精細、最好玩嘅版本，最近接棒上架嘅勇者王Genesic GaoGaiGar掂唔掂先？

建議零售價 $229.9
右拳可以拆除，配合隨盒附件及地台，就可還原Broken Magnum呢一招。

獅頭嘅鬃毛組件可以拆除，以便擺出雙手緊握嘅必殺技Hell and Heaven。

全身都有精細嘅雕功及塗裝，頭部面相及飛翼上嘅眼形圖騰可見一斑。

造型冇得輸

雖然之前都有日系廠家出過Genesic GaoGaiGar嘅模型，不過無論造型以至精細度，NXEDGE STYLE版本都冇得輸，何況後者係完成品，唔使砌、唔使油，Fit晒今日玩具迷嘅「即食」傾向。勇者王嘅機設特色，一向以霸氣行先，即使變身成高度只有80mm左右嘅NXEDGE STYLE，依然忠於原著，透過精細嘅雕功，無論頭部及心口嘅獅頭都做到怒目而視，再配埋一頭「金髮」，還原Genesic GaoGaiGar怒髮衝冠嘅招牌甫士。

可動性稱冠

造型美難以挑剔，玩味又如何？首先主流嘅Q版Figure一向唔重視可動性，不過NXEDGE STYLE反傳統，Genesic GaoGaiGar由頸、肩、肘、腕、腰、髖、膝、踝及雙翼都有可動關節，尤其是肩關節可以向前移位，而手肘嘅屈曲幅度又多達135°左右，活動能力足以稱王，美中不足係尾巴不可動，否則便Perfect了。附件方面，就有一對左右手緊握嘅大拳頭，換上後就可擺出絕招「Hell and Heaven」，為此獅頭兩側嘅鬃毛組件都可拆除，令雙手可以向中間拍埋，令整個甫士更見自然；除此之外，盒內還有一件小組件，用嚟套入右拳，令右拳可以拆出嚟再用地台支架撐起，模擬GaoGaiGar放飛拳「Broken Magnum」嘅一幕。總體嚟講，今次嘅Genesic GaoGaiGar絕對係最有型、最精細、最好玩嘅Q版版本，相信各位勇者王粉絲，都好想Bandai日後出埋GaoGaiGar及GaoFighGar吧！

查詢︰2433 1828（瑞華行）