HTC One M9誘人金銀膶

科技日新月異，呢頭係新事物，轉眼就Out。因此，出咩機都好，唔使急，最緊要快！3月頭先喺西班牙MWC展上發布嘅HTC One M9，轉頭已經宣布將於4月喺香港推出，暫時係最早發售嘅第二季新手機。而其定價為$5,998，亦只係同上代M8開賣時嘅價錢一樣，好合理！

$5,998（4月推出）
採用5吋屏幕，可惜解像度只維持全高清。

機背有2,000萬像素鏡頭，亦設有雙色閃光燈。

前置UltraPixel鏡頭，低光環境下都可以影到靚Selfie。

玫瑰金色機邊，加上銀色正、背面，雙色調效果超正。

兼容多頻FDD-LTE及TD-LTE，身處香港、內地都可以4G上網，另可外插2TB microSD。

內置一系列主題，用家可以自行選用。

可以計算用家行走步數、燃燒卡路里等健康資料。

原廠推出M9專用嘅HTC Active Case及Active Earphones，防水防塵又防撞。

依舊提供Dot View機套，軟件更新後，點陣式設計除可透出預設文字、圖案之外，更可以走馬燈形式顯示文字，甚至玩到小遊戲。

支援Dolby Audio，原裝附送入耳式耳機，音質唔錯。

兩代拍埋，M8（左）、M9（右）設計、按鍵排位都大同小異，新鮮感一般。　

試相
前後置鏡頭都可以加入美顏效果，美女影大頭就唔怕見到臉上瑕疵。

成像顏色與實物接近，雜訊控制能力都不俗。

型號叫得做M9，當然代表係M8嘅後繼機，設計上都充滿上代元素，繼續用鋁合金一體成形機身及髮絲紋機背，手感極好。另外，M9同M8都係用上5吋屏幕、圓角弧底機身，就連機面嘅BoomSound雙前置喇叭擺位都幾乎一樣；想分辨兩機原來好簡單，皆因M9今次引入金銀雙色選擇，機身正面及背面係銀色，機邊就特別改用玫瑰金，仲加入拋光處理，望落都幾高貴，製作認真，值得一讚！今次行貨除咗有金銀色，仲有齋灰色，想低調啲都有得揀。

採用Sense 7介面

作為旗艦機，M9備有Qualcomm Snapdragon 810八核心處理器、3GB RAM等頂級硬件可以話係意料之內，最驚喜係預載Android 5.0作業系統之餘，仲換上全新Sense 7介面，整體操作同Sense 6大同小異，不過就有一系列新功能，當中最特別要數Sense Home Widget以及HTC Themes，前者睇落同一般資料夾一樣，可以擺放不同Apps，查實系統會根據用家身處位置，例如工作、外出、住家，再記錄並分析於不同地點各Apps嘅使用率，從而選擇置頂嘅Apps；後者就提供一系列預設主題之外，用家只要揀選相片，系統就識得分析相片內嘅色調，再創製出多款獨一無二嘅主題，圖示、字形等都可以自訂，超好玩！

大把後製玩相

講到好玩，當然唔少得拍攝功能。比起M8，M9前後鏡頭都有大改動，佢未有採用雙後鏡設計，取而代之係2,000萬像素鏡頭，兼支援4K短片拍攝，而且更用上藍寶石水晶鏡片，一改M8鏡片易於刮花嘅缺點，拍攝時自然更清晰。前鏡頭就改用UltraPixel技術，吸光量更多，於昏暗環境下Selfie冇難度。最過癮係M9內置一系列相片後製功能，除咗有「例牌」嘅相框、美化、換臉、魔法特效之外，仲有「雙重曝光」，可以將兩幅相重疊，激似Lomo效果；「幻影萬花筒」就可以喺相片上加上萬花筒式嘅旋轉及幻彩特效，任你點玩。