Aquos Crystal X無邊升格

東瀛出品的手機有姿勢有實際，毋須力銷硬件規格，淨講設計、功能都夠撐。去年Sharp就有部驟眼看恍如無邊框的手機Aquos Crystal，此機近來推出屏幕加大的新版本Aquos Crystal X，仲已從水路到港！其5.5吋屏幕覆蓋手機表面84.4%，睇片、拍照時，影像活像懸浮空中，望落好盞鬼！

Aquos Crystal X $5,980

塑膠機背外殼用上網格紋理，手感不錯。

機身厚11mm、重157g，不算輕薄。

前置鏡頭改設於手機下方，Selfie要遷就角度。

拆開背殼，即可見主鏡頭兩側分別設有microSD和nanoSIM卡槽。

究竟有幾「無邊」？有圖有真相，黑色邊框幼過牙籤！

用YouTube睇片時，會自動開啟Clari-Fi技術來延伸高音音域，聽起來更響亮。

播《超人類：卓比》全高清預告片，細節清晰，表現亮麗。

試相
內置HQ模式，可提升成像細節，試影花卉層次分明。

同廠手機可使用Swipe Pair分享功能，以Wi-Fi配對後再拍埋兩部手機，便可將圖片直接拖到另一部手機中。

可利用「Clip Now」擷圖功能，只要指尖於上方邊框橫向掃動就可Cap芒。

手掌細，未能一手操控5.5吋畫面的話，可把畫面縮至4吋。

上代Aquos Crystal有個5吋720p屏幕，運行Snapdragon 400處理器，至於Aquos Crystal X除處理器換上四核心Snapdragon 801外，連屏幕亦加大至5.5吋，並且係全高清解像度。當然手機的焦點仍在於其Crystal Display水晶玻璃觸控面板，邊緣之處採用斜向切割方式包邊，以類似棱角光學透鏡原理，將本身已經造得幼細的黑邊遮蔽起來，產生近乎無邊的視覺效果。另外，要做到上、左、右恍如無邊，亦要「借位」，如將前置鏡頭改設於下方，而聽筒部分更換成骨傳導方式，利用震動將聲音傳進用家耳窩。

煲劇聲畫動人

Aquos Crystal X的5.5吋屏幕能夠呈現出「PureLED」的高對比色彩，睇片時特別亮麗傳神，始終Sharp是電視機的翹楚，影像技術自然勝人一籌。音效方面，此機同樣出色，事關得到名牌Harman Kardon Audio加持，它內置Clari-Fi技術，可將經壓縮後失卻部分音域的數碼音訊復原，當用YouTube睇片時，系統會自動開啟相關功能，將高音進一步延伸，聽起來響亮震撼。如果煲劇時想戴Headset，插耳機線後仲識得開啟LiveStage功能，把音色優化，確係照顧周到。

實用功能花臣多

雖說Aquos Crystal X的硬件規格並非時下的超班配置，但都足以對應多工作業及娛樂用途。加上周邊功能零舍多，淨係幼邊框都已經內藏LED通知燈，當有來電和短訊時，邊框會幻彩閃爍，而且手機內置「Clip Now」擷圖功能，只要用指尖於上方邊框橫向掃動即可極速Cap圖，比熱鍵組合更易用。拍攝表現方面，此機有1,310萬像素後置鏡頭，支援先影相後對焦功能外，仲內建NightCatch II增亮夜攝；以及有Photo Sphere畀你玩球狀拍攝；拍片則支援3,840×2,160解像度畫質，一機傍身，去旅行就連DC都唔使拎。然而前置鏡頭僅得120萬，成像難免有些少起渣，自拍輸蝕。