西班牙直擊 Galaxy S6 Edge 左右開邊

年度手機界盛事、喺西班牙巴塞隆拿舉行嘅MWC（流動通訊世界大會），於當地時間3月2日先正式舉行，不過各大廠商卻搶先一步提早發布新作。最令人期待當然係韓廠Samsung，佢哋搞咗個Galaxy Unpacked記者會，發布Galaxy S6及Galaxy S6 Edge兩部旗艦作；除咗硬件超班外，仲大玩金屬邊框，再加雙面玻璃超靚設計；當中又以S6 Edge最有驚喜，備有Dual Edge芒（雙邊曲面側屏幕）。想入手的話，就要開始儲定錢，4月10日有售！

S6（左）及S6 （右）Edge同樣備有5.1吋屏幕，顯示超清晰。

S6 Edge有四種配色，左至右分別為白、黑、金以及獨有嘅翡翠綠。耳機、充電插口及喇叭均設於機底。

試行Benchmark，得分破頂，證明處理器效能超強。

同Note Edge一樣，設有Information Stream欄，不過可以獨立開啟，唔使着晒全個芒。

兼容無線充電，擺上底座即可叉電，方便！

機背除咗1,600萬像素鏡頭，右方仲有心率感應器，配合《S Health》，可以量度心跳率及其他健康資訊。

開啟Edge Lighting功能，將手機翻轉後，彎芒會發光嚟提示來電及訊息，開會等情況啱用。

自拍時心率感應器可以充當快門，相當方便。

三星電子行政總裁兼資訊科技及流動通訊業務部總裁申宗均（JK Shin）親臨現場，佢表示對新機好有信心。

機身飛甩膠感

今次發布會除咗有大家預期嘅新一代Galaxy S6之外，仲一併帶埋Galaxy S6 Edge出場，兩機可以話係兄弟作，皆因設計、按鍵布局甚至規格、功能都類同，就連部分機套都可以共用添！記得上代S5被網民戲稱「膠布」，今勻S6就換上金屬邊框及玻璃機背，完美飛甩膠感，邊位亦順滑不𠝹手；而且機背帶有拋光效果，感覺高貴大方。不過有型嘅代價就係玻璃面極易黏上手指模及污漬，唔用機套的話，相信就要經常抹機！另外，除咗珍珠白、石墨黑、鉑金三種大路基本配色外，S6就有寶石藍、S6 Edge則有翡翠綠兩款特別配色，搶眼又有新鮮感。

創新Edge Screen

與上代S5相同，Galaxy S6及S6 Edge同樣搭載5.1吋屏幕，解像度就由全高清大幅升級至2K級別，像素密度更高達577ppi ，鮮艷又銳利，顯示幾乎無瑕疵！而S6及S6 Edge最大分別當然就係後者用上Dual Edge屏幕，將同門Note Edge嘅曲面側屏發揚光大，左右兩邊都係「彎芒」。廠商更為新機加入一系列全新「Edge Screen」功能，一般待機熄芒情況下，於曲芒位置左右Drag，即可開啟「Information Stream」，顯示時間、日期、提示訊息等，比較特別就要數「Edge Lighting」及「People Edge」，前者將手機翻轉後，彎芒識得發光，提示有來電及訊息；後者則可於畫面邊緣增設功能欄，顯示最多五個聯絡人之餘，當有未讀訊息來自此五人的話，屏幕邊更會有條黃線作提示。最重要係用家可以調校「Edge Screen」嘅左右位置，左、右手用都方便。

10分鐘快叉

作為旗艦機，硬件當然要頂班，佢換上全新自家64bit八核心處理器及LPDDR4 3GB RAM，現場以跑分程式測試，結果得分逾64,000分，成功登頂；加上預載Android 5.0作業系統以及全新介面，撥頁操作以至玩多重視窗都極流暢！惟新機改用一體成型機身後不設記憶卡槽，犧牲容量擴充，幸好提供32、64及128GB容量，一般用家應該夠用。鏡頭方面，後置鏡頭雖然維持1,600萬像素，不過升級至F1.9大光圈及OIS光學影像穩定系統，低光拍攝更有保證；再配合Auto Real-time HDR、0.7秒快速啟動拍攝、專業模式等新功能，用嚟玩Snapshots一流。值得一提，Galaxy S6及S6 Edge均支援內嵌式無線充電技術，兼容WPC及PMA標準的充電板，以後充電唔使周圍搵線材；另外又支援高速充電，廠方表示充電十分鐘即可提供四小時使用量，隨時叉十分鐘就夠用！