正所謂道高一尺、魔高一丈，今期變形金剛爆發「Combiner Wars」，唔只大玩合體元素，就連「文哥」柯柏文（Optimus Prime）都有新造型示人，身為狂派首領嘅麥加登（Megatron），點可以畀博派威晒？最近麥加登唔只換新Look，仲要打孖上以雙版本登場，夾埋旗下嘅五合一巨無霸飛天虎（Menasor）上陣。博狂兩派嘅大佬，你哋打還打，不過出貨出得咁密，睇嚟打仗係噱頭，打劫粉絲銀包似啲喎！

Megatron 建議零售價：$499.9

兩款狂派大佬嘅雙眼都用透明膠料製成，鍾意影相嘅玩家，喺後尾枕打燈落去，就有疑似發光效果。

合體後嘅飛天虎，的確大大隻夠噸位，可動性亦有交代，可惜榫位唔算穩陣，擺大動作甫士時都幾易「分體」。

死路、死火、越線與迪士龍四款，隨盒都會附送一本變形金剛漫畫，增加收藏價值。

提起柯柏文，老變粉絲一定聯想到大拖頭，不過換轉係死對頭麥加登嘅話，聯想對象就有好多選擇，唔計荷里活電影版本，只計動畫版，已經有G1年代嘅P-38手槍、《Beast Wars》嘅暴龍、《Transformers Prime》及《Transformers Animated》嘅戰鬥機等等，至於今次嘅Combiner Wars系列就變成坦克車咁款，而且有Megatron及Armada Megatron雙版本，作為Die Hard粉絲者，睇怕買少一款都會唔安樂。

雙造型大同小異

Combiner Wars嘅Megatron及Armada Megatron，彼此嘅第二形態都係貌似美軍M1嘅坦克車，講造型，的確似足M1咁橫咁有霸氣，而且廠方標明只要15個步騷就完成變形，唔似以前啲Leader Class設計咁複雜，明顯分別只在於Megatron用番深入民心嘅銀灰色，而Armada Megatron就以草綠色為主。至於機械人形態方面，兩者除咗顏色有別，最大出入在於頭部設計，Megatron用番傳統嘅頭盔Look，而Armada Megatron就好似鍬形蟲咁款有一對大角，不過面相方面，兩者同樣兇神惡煞、唧都唔笑嗰種。造型方面交到貨，但係可動性就讚唔落，喺坦克車形態時，雖然炮塔可以左右轉動，但係炮管只可保持水平形態，冇得升高、降低。不過最大問題出於「合體」兩個字，同系嘅柯柏文可以同飛天派（Superion）嘅手腳玩合體，但係Megatron與Armada Megatron都冇呢支歌仔唱，玩味弱咗啲喎。

合體靠晒飛天虎

博派有飛天派玩合體，仲可以同文哥Crossover，狂派呢邊就靠晒飛天虎，後者由車主（Motormaster）為核心，即係合體後嘅軀幹部分，至於手腳就由死路（Deadend）、死火（Breakdown）、越線（Offroad）與迪士龍（Drag Strip）合組而成，而五者亦有機械人與汽車形態。Combiner Wars與以往嘅合體變形金剛最大分別，就係加入百搭元素，合體後無論手腳位置，都用咗相同嘅榫位連接，換言之，唔只死路、死火、越線與迪士龍任何一個都可變成合體後嘅手或腳，甚至將死對頭飛天派嘅手腳交換都得，到時就難為正邪定分界了。好玩還好玩，不過玩家要有心理準備，合體後嘅榫位，唔只係連接位，仲係關節所在，筆者試玩過後，發現無論手腳，受力程度只屬一般，擺大動作甫士未必企得穩，仲幾易甩番出嚟，玩家把玩時要畀多少少耐性了。

查詢：2738 8300（Hasbro HK）