新年新氣象，恭祝大家羊年氣勢齊齊彈起！要數波鞋界最彈得起嘅代表，adidas Boost必然係前列分子，呢種緩震與回彈都零舍勁過人嘅中底物料，放喺前掌又得、後掌亦得，甚至由鞋頭包到鞋尾都得，今期上架嘅Pure Boost就用咗全掌式Boost中底，由腳趾到腳踭都彈得起，而且仲係CNY農曆新年特別版，新正頭着住佢，舒服之餘又好腳頭！

adidas Pure Boost

TMAC 3 CNY $999

黑色鞋面印有華風紋理，寓意吉祥。

鞋舌加上羊年專屬裝飾，夠晒應節。

除咗用全掌式設計之餘，而且厚度超過其他Boost鞋款，舒適程度冇得輸！

紅色Pure Boost CNY嘅鞋面，布滿華風圖案暗花。

紅、黑雙色嘅Pure Boost CNY，鞋舌上都有羊年圖案點綴一番，留意鞋帶都換上華風款式。

Boost底下加上耐磨物料做外底，着得多都唔怕蝕底。

Pure Boost CNY $1,099/對

潮人Kanye West都親身力撐Pure Boost，你唔係唔知啩？

D Rose 5 Boost "Superstar" $1,599

左、右鞋墊各有不同圖案，大可視為performance與originals嘅Crossover。

最大特色莫過於貝殼形鞋頭，似足Superstar。

鞋面加入蛇皮紋理，更添時尚氣息。

D Rose 5 Boost "Brenda" $1,499

鞋面看似紅色一片，其實布滿D Rose Logo與星形暗花圖案。

唔只顏色，鞋頭仲有「Brenda」字樣，錫媽咪錫到出面。

Boost係三間牌最新、功效最強嘅緩震物料，尤其是回彈效果，筆者試過，真係KO唔少同級對手，不過Boost面世以來，一直集中於Performance類別，例如跑鞋及籃球鞋，幾時輪到Casual Wear都可以彈彈吓先？唔使再等嘞，Pure Boost就打破框框，功能上既可作為Training Shoe，簡潔造型亦適合作為便服配搭，就連潮人Kanye West都Buy，大家可以放膽入貨啦！

特製雙色CNY

除咗造型時尚化，切合日常嘅配搭風格外，Pure Boost亦有明顯嘅功能特點，首先Boost中底屬於全掌式設計，覆蓋範圍比起Energy Boost更大，而且Boost直接與鞋身相連，兩者之間不設EVA或其他物料阻隔，甚至連鞋墊都剔走埋，令整片腳掌嘅每個位置，都直接感受到軟綿綿而又彈得起嘅奇妙感覺，Feel So Good！另一方面，留意鞋領兩側都設有Tirrenina墊位，加強對腳踭嘅貼腳效果外，Tirrenina仲係以特別嘅麖皮製成，令外觀上更添質感。至於今期上架嘅CNY版本，分為紅、黑雙色，兩者嘅鞋舌上都有羊年專屬圖案，鞋帶亦印有華風紋理，從細節上應節一番。同期仲有TMAC 3復刻版本，鞋身用上紅、黑雙色組合，加上羊年圖案鞋帶扣，唔畀Pure Boost專美，拜年都要預埋佢。

D Rose 5變色唔執輸

呢期爆紅嘅，唔只Pure Boost CNY，仲有D Rose 5 Boost "Brenda"，雖然設計概念同農曆新年冇關，不過紅噹噹嘅賣相，注目度同樣高企；顧名思義，呢款"Brenda"係向Derrick Rose嘅母親大人Brenda致敬，紅色正係佢老人家嘅「賣飛佛」顏色，留意鞋頭位置仲刻有「Brenda」嘅字樣，而紅色嘅鞋面就有D Rose Logo與星形暗花圖案，後者取材自芝加哥嘅州旗。除此之外，D Rose 5 Boost另有時尚變奏版"Superstar"，鞋面用上蛇皮紋理之餘，最大特色係改用貝殼形鞋頭，而貝殼形鞋頭正係adidas嘅經典鞋款、於1969年首度推出嘅Superstar嘅外形特徵，所以左、右鞋墊分別印上D Rose及adidas originals嘅Logo，致敬味道形諸於外。

查詢：2730 0157（尖沙咀漢口道adidas旗艦店）