CAT S50硬漢升級

重工業器材CAT（Caterpillar）早前推出過B15手機，事隔半年又有新作登場。新機名為S50，繼續玩硬淨八角外形，兼且具備810G軍用標準認可，落水、跌落地都無問題。此機硬件仲比上代升級不少，支援4G制式，硬朗得來有內涵！

CAT S50 $4,488
機身比上代大部，屏幕增至4.7吋。

機背設有800萬像素鏡頭，拍攝效果不俗。

有三粒實體鍵，左右兩個為音量鍵，長按中間即可開啟電筒功能。

機側用上橡膠及鋁合金圍邊，夠硬淨之餘，手感都唔差。

改用一體式設計，更換SIM卡及記憶卡就需要打開保護蓋。

機面特意印上MIL SPEC字樣，講明符合軍用標準。

機背有大大隻CAT標誌，加上凹凸坑紋，夠Raw！

採用Snapdragon 400處理器，配合2GB RAM，屬中階規格。

內置一系列CAT Apps，包括可租用CAT重工機器，不過相關服務香港用唔着。

驟眼睇S50，好似同前作B15分別不大，同樣玩八角形機身，有橡膠圍邊，用鋁邊機側，機背有凹凸深坑，不過按鍵布局就有少少改變，另改用一體成型設計。S50支援IP67標準，可以防水、防塵，於水深1米下仍然可以正常操作30分鐘。同時，S50通過810G軍用標準，可以承受有限度震盪，就算於1.2米掉落地都頂得住；而且可以於-25℃至55℃的極大溫差下正常操作，去到極地都冇有怕啦！唯一要彈係上代B15已經重達170g，今次S50竟增磅至185g，機身都幾墜手！

升級規格追上時代

今次S50硬件來個大升級，先講屏幕，由上代4吋加大至4.7吋，而且解像度亦提升至720p，顯示清晰亮麗得多。硬件上，處理器及記憶體都「升呢」，前者換上Qualcomm Snapdragon 400四核心處理器，後者則有2GB RAM，效能與一般中階機相近，睇片、上網都冇窒機。另外，與B15不同，S50不再支援雙卡雙待，反而兼容4G制式，實測下載速度都超過10Mbps，下載Apps、串流自然唔使慢慢等。