聽日就舉行長跑盛事「渣馬」,近年唔少跑友無論係練習定比賽時都會邊跑邊聽歌,今次小記就搵咗前香港田徑隊成員、長跑好手蘇凱男(蘇Sir)出馬,試勻幾款熱門運動耳機,想知邊款好用嘅跑友必睇!

Plantronic BackBeat FIT $998(a)

附送運動臂帶,表面仲加入3M物料,有反光效果,夜跑更安全。

AfterShokz Bluez 2 $779(b)

Bluez 2只需好似頭帶咁放上耳骨位置即可,佩戴極容易。

Jabra Sport Pulse Wireless $1,799(c)

雖然心跳偵測反應唔夠心跳帶快,用嚟做數據參考都有價值。

Soul Run Free Pro $880(d)

音色好靚,但隔音太好,聽唔到路面狀況。

平時跑步都會聽歌嘅蘇Sir話:「邊跑邊聽歌其實可以調節到情緒或者令情緒高漲啲,跑長途、重複性高嘅路線時,聽歌就特別有效。有啲跑手仲會有系統地揀選曲目,例如頭段揀慢歌,中後段體力下降時就聽節奏急嘅快歌。不過要留意,戴耳機跑步需要時間適應,好似戴住眼鏡嘅跑手可能會覺得耳機頂住眼鏡臂而唔舒服,因人而異。」

蘇凱男Bio

前香港田徑隊成員,10公里、半馬拉松、3,000米障礙賽前青年紀錄保持者,現時身兼中學田徑隊教練及Nike+ Run Club總教練。

個人最佳時間:10公里:34分17秒

半馬拉松:1小時16分05秒

3,000米障礙賽:9分49秒37

Choice 1:Plantronic BackBeat FIT

Plantronic首個運動耳機,支援P2i軍用級納米防汗技術,防汗水及水滴。跟機仲送埋雙面彈性保護袋,反轉可以變做運動臂帶擺手機,超實用。

重量:24g

試後感

「耳機夠輕身,線材長短適中,其耳鈎設計戴上耳仔都夠穩陣。最抵讚就係按鍵設於兩邊耳筒位置,一摸就搵到,美中不足就係冇獨立音量鍵,調校音量唔就手。個人最唔慣係運動臂帶,因為自己慣常將手機袋喺褲袋、腰包,臂帶反而搞到雙手擺動時唔平衡。」

Choice 2:AfterShokz Bluez 2

採用納米塗層及防水塑膠墊片,抵抗汗水當然冇問題。此乃極少見嘅耳骨傳導藍芽耳機,耳筒貼上耳骨位置就聽到,適合唔鍾意塞住耳仔嘅用家。近期仲加推青綠新色,比原版黑色Sharp得多。

重量:43g

試後感

「硬身頭帶設計容易佩戴,戴上後較難移位,大幅度郁都唔會甩。唯一擔心係得一個尺寸,男士應該啱用,頭圍較細嘅女仔可能會有鬆。因為用上耳骨傳導技術,音樂音量唔算好明顯,喺嘈嘅地方有機會唔夠聲;亦因如此,戴上耳機後仍可聽到外面聲音,感覺好似四周播緊音樂,效果自然。」

Choice 3:Jabra Sport Pulse Wireless

通過IP55防水濺及防汗測試,戶外用都冇問題。佢係全球首款具備心跳偵測功能嘅藍芽耳機,用家只要下載專用App《Jabra Sport Life》就可以測心跳,又或者設定不同訓練目標,啱晒好動一族。

重量:16g

試後感

「耳機好輕身,不過線材較長,跑動時有機會揈甩。最大功能一定要數心跳偵測,心口唔使戴多條心跳帶就可以量度心跳,練習、比賽時就可以參考心跳率而調整跑速或者訓練強度。」

Choice 4:Soul Run Free Pro

係測試耳機入面唯一一款冇語音提示,配對、使用時冇咁方便。最大賣點係勁多明星力捧,扁線材加上大大個「S」,比一般運動耳機型仔啲,唔係運動造型戴出街都冇問題。另外,耳機仲特別支援aptX技術,音色相當好。

重量:17g

試後感

「隔音能力超強,戴上後近距離都聽唔到對方說話,平時用嚟聽歌當然好,不過用嚟跑街就相對危險,較適合室內練跑之用。耳機整體重量夠輕,不過耳筒部分略嫌大舊,都幾易揈甩。」

查詢:(a)2395 3913、(b)2553 1151、(c)2201 7233、(d)2262 1173