日牌VentureCraft便攜式耳擴，樣靚聲正兼且Gimmick多，頗受發燒用家追捧。近來就有新作Vantam抵港，除了機身造得相當輕巧，兼提供到平衡輸出之外，最特別係可以畀用家自己換Op Amp升級，不出一、兩分鐘時間就可以自己拆開機身換Op Amp「變聲」，好聽又好玩！

$5,099

Vantam其中一項特別玩法是可拆殼換Op Amp。

用螺絲批輕力一撬，即可自行拆走Op Amp更換。

只需在機面一撥，即可將訊源升頻至最高32bit/192kHz。

設有2.5mm全平衡耳機輸出，可方便直駁全平衡耳機。

機身兩側各設兩顆螺絲，要自行拆除亦相當方便。

機身支援充足，手機可簡單直駁Vantam使用。

不同牌子Op Amp各有不同音色偏好，在坊間及網上都不難搵到，不過網購則較易買到假貨。

VentureCraft Vantam機身細細，僅重180g，比同級產品輕巧，仲要細部過目前的標準大芒手機。機身外殼以鋁材製造，至於機身框架則以碳纖維製作，拎上手相當紮實。

簡單容易自行換Op Amp

仔細一睇，Vantam機身兩側藏有幾口小螺絲，只要小心地用螺絲批扭開，就可以轉換Op Amp。轉換Op Amp有甚麼好處？不同廠牌的Op Amp晶片都各有聲音特徵，用家可以根據自己的音色喜好而轉換Op Amp，玩法夠晒靈活，而且由拆機到換Op Amp全程都只不過係一、兩分鐘時間。

Op Amp價錢方面相差都幾大，百幾蚊又有，幾千蚊都有，好似已停產的軍用級TI OPA637SM就貴到成三千大元；但要留意，如果經由網購的話，可能有誤買假貨的風險，因為從外形上係好難睇得出分別。為求穩陣，可以向信譽佳的代理購買。

2.5mm插口供全平衡輸出

除了換Op Amp這個特別玩法外，Vantam用料和設計都幾高級。機內用上TI PCM1795旗艦級解碼晶片，非平衡線路則用上TPA6120耳放，輸出可達到80mw×2。值得留意係Vantam支援左右聲道獨立運作的全平衡耳機，全因採用一如高階DAP AK240的2.5mm全平衡輸出插口，可直出全平衡耳機，得以享富Hi-Fi味的靚聲。

Vantam接駁配備上都幾齊全，無論係iPhone、Android手機或其他DAP，都可以輕易以連接線駁上Vantam使用。Vantam亦跟之前同廠的其他便攜式耳擴一樣，提供簡單升頻功能，只要在機面上撥選所需要的取樣率，耳擴就即時用上DSUS升頻技術，將CD格式或壓縮音樂格式升頻至最高32bit/192kHz高解像度效果，令音色細緻圓滿。訊源方面，可對應MP3、AAC、FLAC、ALAC、WAV之外，亦能對應1bit/5.6MHz的DSD訊源。值得一讚係Vantam可以一邊充電、一邊使用，外出時可駁外置電源，屋企亦可以插濕電使用，相當方便。

SPEC

DAC解碼晶片：TI PCM1795

操作時間：約7小時

體積：126×66×18mm

重量：180g

查詢：3188 9086