我沒有六呎高，但好打到離譜，唔只Super Hero嘅Ant-Man，日系動漫亦都有唔少超強豆丁，經典者就有《龍珠》嘅比達、《幽遊白書》嘅飛影，今期代表當然係身高只有160cm，但係巨人見到佢都驚嘅「兵長」里維（Levi Ackerman），唔只被封為「最強的士兵」，而且成為《進擊之巨人》中最受歡迎角色之一，人氣度甚至超越男主角艾連（Eren Jaeger），咁有發揮性，又點可以唔出1/6 Action Figure先？

Medicom Toy RAH No.662《Attack on Titans》1/6 Levi
建議零售價︰¥23,600

整套立體機動裝置都做足金屬塗裝，細節雕工亦令人滿意。

由於成套衫都好貼身，加埋立體機動裝置都幾累贅，一定程度上影響咗下肢嘅可動幅度。

綠色斗篷係標準附件，至於頭巾、領巾及掃帚，就係兵長「初回生產限定版」嘅獨有Parts。

調查兵團嘅飛翼隊徽，清晰出現於斗篷及皮衣上。

纜繩以鐵線製成，襟玩程度總算可以加番分。

除低斗篷、外套，換上頭巾、領巾及掃帚，就可變成招牌嘅打掃Look。

隨盒附有三款表情，以及兩款前額頭髮組件，畀用家自組兵長嘅各種Chok樣。

隨盒附有兩款握刀專用嘅造型手掌，可以擺出正手或反手嘅出刀甫士，同時另有掃帚專用手掌。

繼男女主角艾連及米卡莎（Mikasa Ackerman），以及要角阿爾敏（Armin Arlart）和亞妮（Annie Leonhart）之後，Medicom Toy嘅Real Action Heroes（RAH）「進擊系」1/6 Action Figure角色，終於輪到成個古仔最好打嘅里維。當調查兵團其他士兵就算圍住巨人嚟打，都往往畀巨人攝牙罅之際，唯獨兵長可以將巨人斬瓜切菜，甚至能夠同時間出招KO兩個巨人，難怪成個兵團最矮係佢，但係除咗團長艾爾文（Erwin Smith）之外，全團人最服嘅都係佢，就連《進擊》嘅粉絲都封佢做男神啦！

陰沉眼神最入戲

Figure造工成功與否，頭雕水準佔咗一半，RAH嘅兵長又表現如何？Figure以動畫版造型為藍本，劇中兵長嘅表情款式唔算多，但變化幅度就好大，最有代表性嘅分別係平時嘅Cool Look、潔癖發作時嘅斜視Look，以及斬殺巨人時嘅鬥雞眼Look，RAH都有齊，例如前兩者嘅眼簾、眼肚都落重Shadow塗裝，營造深沉形象，至於鬥雞眼就完全表達出兵長斬殺巨人時嘅亢奮狀態，如果襯埋飛起晒嘅前額頭髮組件，殺氣之盛拍得住暴走中嘅Evangelion初號機。美中不足嘅係兵長明明矮過艾連、米卡莎接近10cm，但係整個RAH「進擊系」嘅素體高度都保持喺30cm左右，未能如實反映兵長嘅身形特徵囉。

初回特典送打掃Look

至於配件方面，大體上同之前嘅同系Figure差唔多，仿皮上衣、膠製長靴、內藏鐵線可以任意屈曲造型嘅布製斗篷，以及最深入民心嘅立體機動裝置都統統有齊，而且「刀鞘」內嘅刀刃都係獨立組件，可以玩到更換刀刃嘅招牌甫士，而刀鞘箱嘅上面可以加裝纜繩組件，模擬兵長凌空出招嘅動作；論雕工、塗裝，RAH嘅立體機動裝置都令人滿意，不過當高度只有14cm左右嘅figma版「進擊」Figure，其立體機動裝置前後都可加裝煙霧狀嘅特效組件加強逼真效果時，大隻咁多嘅RAH 1/6 Figure竟然冇，又賣貴咁多，真係講唔過去。另一方面，現時有售嘅RAH兵長屬於「初回生產限定版」（First Production Limited Ver.），額外附有白頭巾、白領巾及兩支掃帚，組裝成兵長潔癖發作大掃除時嘅招牌奇怪造型，總算喺可玩性方面挽回分數。

網址：www.medicomtoy.co.jp