Huawei Ascend G7強勢影相

手機除咗用嚟WhatsApp、睇Facebook之外，當然最重要用嚟影相；因此，對鏡頭嘅要求自然有幾高得幾高，高階機故然要影相靚，就連中階機都唔可以失禮！有見及此，華為（Huawei）新機Ascend G7雖然只係走中階路線，不過就分別備有1,300萬像素後置及500萬像素前置鏡頭，無論影景、拍人像都極有水準，女生最啱使！

Huawei Ascend G7 $2,680

內置「省電」功能，提供多種省電計劃之外，亦可進行電源監控，食電Apps一目了然。

全焦模式可以於拍攝之後，先至揀選焦點，都相當好玩。

前後鏡頭都支援10級美顏，女士一定要用！

後置鏡頭達1,300萬像素，亦有LED閃光燈。

記憶卡及SIM卡槽都需要用卡針打開，稍為不便。

前置鏡頭都有500萬像素，仲有88°廣角添！

重167g嘅機身唔算太墜手，不過7.6mm就厚咗啲少。

近年國產機愈做愈好，尤其手工方面有明顯提升。Huawei新機G7就用上一體成型設計，機背、機側局部位置亦特別用上金屬磨沙物料，手感順滑之餘，仲有效防污、防指紋，一舉兩得！唯一麻煩就係記憶卡及SIM卡槽都需要卡針先打得開，個人認為唔太方便，要扣分。此機最大賣點就係超強攝影規格，前置及後置鏡頭分別達500萬像素及1,300萬像素，單計像素已經比唔少大廠日韓大廠旗艦機強，前置鏡頭更支援88°廣角及全景自拍模式，玩超Wide自拍或者群拍一流；加上內置10級美顏，人人都變白滑美女啦！而後置鏡頭則具備F2大光圈，實拍對焦、測光快而準，更加入全焦模式，可以先拍攝、後揀焦點，玩前清後朦景深效果特別明顯。

配備高質屏幕

至於規格，G7備有5.5吋720p解像度IPS屏幕，目測可視角、亮度都夠晒高，表現唔比其他旗艦機輸蝕；另搭載Qualcomm Snapdragon 410 1.2GHz 64位元四核心處理器，配合2GB RAM，效能亦算合格。加上此機支援Cat 4 LTE制式，下載速度最高可達150Mbp，上網夠爽！不能不提，此機雖然玩一體成型冇得換電，不過就內置3,000mAh特大電池，仲內置智能省電程式，可以令電池續航力提升30%，廠方仲話普通用量嘅用家喺呢個情況下，可以使用約48小時，相當誇張。