1977年面世嘅《Star Wars》，唔只係Sci-Fi界嘅不滅經典，仲炮製出史上最強奸角Darth Vader，「I'm your father」呢句對白令粉絲入晒腦之餘，仲有Episode 5 & 6嘅父子對決，甚至榮登《TIME》封面人物等，種種大事依然叫人津津樂道，做奸角做到咁巴閉，前無古人之餘，相信都好難後有來者。就趁今年星戰強勢回歸，Darth Vader就由Dark Forces轉投Hot Toys陣營，成為港產原力嘅最強代表！

維生器參考過本地星戰團體「501st」嘅意見，按鍵間距收窄咗，不過咪以為有得着燈，事關睇勻第四集每個鏡頭都冇着過。

當年嘅Darth Vader戰靴係仿照德軍長Boot改造而成，HT就利用唔同組件還原出嚟，絕非一件啤膠咁求其。

手臂面係直間，而手套面就係橫間，跟足當年嘅戲服設計，夠眼利！

腰間設有倒鈎，可以穩穩陣陣掛到激光劍。

腰帶兩邊嘅控制盒加埋光劍，正式推出時會有着燈效果，令人期待。

頭盔資料嚟自1/1道具，留意正面係銀黑雙色，並非見慣見熟嘅全黑色。

Howard

或者連George Lucas都估唔到，《Star Wars》對後世會有咁大影響，飲星戰奶水長大嘅一群，依家都變成3字頭、4字頭一族，最Hardcore粉絲嘅代表人物，HT主腦Howard當然有份，由細細個買星戰玩具、儲紀念品，到今日終於Dream Come True，手握星戰嘅人偶製作版權，當然要開行Turbo，旗下嘅Stormtropper、Han Solo、Chewbacca及Boba Fett已經喺去年先後面世，嚟到2015，打響頭炮嘅正係人氣No.1嘅Darth Vader，Howard表示︰「整個星戰計劃其實都冇推出時序，基本上Lucasfilm批咗，我們都想盡快讓玩家擁有，適逢Vader喺年頭終於完成審批，我哋亦隨即發布、收訂，亦都藉此谷一谷今年嘅星戰人氣。」

缺陷原是美

眾所周知，星戰係玩具深淵，齋計Darth Vader嘅3.5"吸塑公仔、頭像、全身像已經多如恒河沙數，去年SideShow仲出過被玩家譽為最完美嘅1/6 Action Figure；珠玉在前，如何突破變成HT喺今次製作上嘅最大難題，最後以三個字解決︰「缺陷美」。Episode 4早於1977年拍攝，當年嘅戲服製作當然唔似今日咁精細，HT就將呢啲咸豐年代嘅瑕疵，喺自家嘅1/6版本身上還原出嚟，例如頭盔兩邊唔對稱、銀黑相間兼有少許啞色、手套呈橫間而非後嚟嘅直間、緊身衣帶有殘舊感等等……就試辦所見，整體感覺的確唔似SS咁光鮮，充滿懷舊風味，即使角色係同一人，但感覺就有明顯分別，而且身形比例上，HT亦處理得較好，難怪連出名嚴格嘅Lucasfilm都冇挑剔，一於Pass過關。

素體高人一等

電影人設方面，Darth Vader高人一等，皆因演員David Prowse足有198cm之高，既然HT標榜電影原味，於是專登新製一款高35cm嘅Body，並且強化肌肉線條，全幅披掛之後，更顯英明神武，擔心嘅只係閣下嘅Figure櫃夠唔夠位放。服裝方面，黑色緊身衣採用波浪壓紋布料車成，斗篷用咗重身物料加強下垂感覺，至於以肩甲、胸前維生器、腰帶及靴甲等細節當然不可少，而且附有機關，據知正式推出時，玩家只要撳個掣，就會發出Darth Vader獨有嘅深沉呼吸聲，最出位係激光劍可以發光，劍柄咁幼，到底電池可以放喺邊？HT目前賣晒關子，話大貨推出時自有分曉，hehe，玩家即管走着瞧。

新作預告：Howard親證︰「Leia開發中！」

HT「星戰計劃」始動，星戰迷已經做好破產嘅心理準備，問題只係破產前買到幾多心頭好，對此Howard就向大家披露開發進程︰「雖然我們攞齊七集星戰電影嘅製作版權，但係暫時我們會集中推出第四至六集嘅角色，即將收訂嘅有Obi Wan，而Princess Leia亦全力開發中，相信好快就可以同大家見面。」憑HT功力，相信化身Action Figure嘅Leica公主唔使再膠面示人，叫人期待！

HT MMS279《Star Wars Episode IV : A New Hope》 1/6 Darth Vader

零售價︰$1,930

預訂價︰$1,890

推出日期︰今年第2至第3季

facebook︰www.facebook.com/hottoyssecretbase

網址︰www.hottoys.com.hk

微信︰HotToysHK

查詢︰3722 3988（旺角彌敦道信和中心20樓Secret Base）

*圖片所示乃產品原型，與最後完成品或有少許分別。