《Gundam Breaker 2》拆一砌百億

去年高達模型動作遊戲《Gundam Breaker》推出之時，剛巧是講Gunpla對戰劇情的動畫《Gundam Build Fighters》播放檔期，令作品更具話題性。今年續作《Gundam Breaker 2》於第二季動畫《Gundam Build Fighters Try》播出期間上架，新作提供逾百種Gunpla，若果將所有高達模型「拆骨」，不同部件Mix & Match的話，可有多達一百億種改造砌法！另外，本作零件可「升呢」，武器亦可以逐件砌，大型MA和戰艦又以頭目身份參戰，仲有單機劇情，比上集有誠意得多！

《Gundam Breaker 2》

太空坦克頭加上陸戰型高達身體，再配埋魔蟹對腳，玩家動動腦筋便可改造出搞笑Gunpla。

玩家可以將熊霸塗裝成電鍍金，光澤表面更可反映背後以模型盒堆砌的場景關卡。

遊戲初回特典會送《Gundam Build Fighters Try》三部主角機體的下載碼，讓玩家率先開戰。

跟超巨型MA高達GP03D決戰，既要避開巨劍又要應付力場。

幾乎所有高達對戰遊戲必定登場的魔霸，今次會化身「模型」跟玩家血戰。

本作加入單機版劇情，講述殖民星聯合軍和地球軍的衝突，跟原著故事無關。

揮舞雙劍的機體，能夠利用連續技將敵人撥上半空再駁招，令對手無還擊空間。

連遊戲外傳《機動戰士高達Missing Link》的蒼白騎士都有登場，至啱之前錯過限定模型的朋友。

《Gundam Breaker 2》

承接動畫熱潮，本作的初回遊戲碟便附上第二季主角小隊之三款模型特典DLC，分別係Build Burning Gundam、Powered GM Cardigan和Lighting Gundam，讓玩家下載，搶先試砌。講番遊戲本身，開發單位以「超絕進化」來形容，因遊戲的模型改造玩味濃，收錄過百款HG 1:144及MG 1:100比例模型，部分更是人氣Gunpla，如HG高達Ez8、HG Rozen Zulu等。同時照顧單機需要，本作虛構了一個跟高達原著無關的劇情，講述地球軍與殖民星聯合軍駕駛多款機動戰士的連番衝突，相比上集齋開Room上網，搵Friend開關卡刷素材來得好玩。

零件進化武器創造

玩法方面，基本操作同上集無異，都係一堆膠感十足的高達模型大混戰，當打爆敵機時會有撞散模型效果；惟有一個弊端仍然未解決，就是PS Vita玩家無法跟PS3玩家連線，搵人挑機難免「房間」冷清。好在除一貫地要和1:60 Perfect Grade模型對打外，更加入了大型MA及戰艦作挑戰頭目，玩家要搭乘現場所有的飛行器，或操縱巨型炮台才有力一拚。另外，遊戲追加了零件進化系統，於戰鬥時部分目標會顯示不同強度的「PE膠接駁圈」，用來為零件升級；舊玩家仲可以將前作的Save直接過檔到本作，所得零件會全數再現，慳番重新儲過的時間，但強度會歸零，需要「升呢」。再者，今集的武器亦要玩家儲素材製作，而且不同武器的特性和威力均十分講究。如火箭炮可在一定範圍爆炸擊走敵人，好讓前線機體有機埋身肉搏；又如水中機體「龜霸」的近身武器鈎爪，可勒緊並掟走敵人，廿多款武器都有不同打法，齋鑽研戰術都有排玩。