對合金迷嚟講，年尾真係「流血不止」，太陽塔Robot、Macross YF-30、Metal Build雪崩、合金魂勇者王等大作接踵而來，未計再版六神合體，問你破產未？而且撇除Bandai產品，今季仲有Art Storm嘅EX合金「Getter 1 最終決戰Ver.」，更係唔買唔安樂，戰損Look比當年「新世紀合金」更具迫力，經典甫士唔只扯出核心一幕，今次誇張到玩埋火箭射穿肚，血腥度爆錶！

EX Getter 1

附上合金製Getmachine Eagle，兩側機翼就係Getter Cutter。

拆走火箭中央部分，再一分為二，之後前後嵌入Getter 1嘅身體，就可以重現穿肚一幕。

附上斷角加爛面Look，仲可以拆走面罩，見到機械內構。

變番靚仔Look，Getter 1嘅主武裝只有一對三一戰斧，欠咗機關槍，實在有啲可惜。

Boxset另有完整版本嘅恐龍帝國火箭，夠晒周全。

打開胸甲，就可以裝嵌三一熔爐，揭起下腹就係絕招Getter Beam嘅發射口。

勇戰不倒射穿肚

講起戰損Look嘅Getter Robot，多年前「新世紀合金」系列都出過，不過論造型氣勢，今次由已故鬼才造型師佐藤拓設計、藤原辰弘立體炮製嘅EX合金就勁得多，而且專登整咗套「最終決戰Parts Set」，最精彩嘅換件就係重現原著終戰時，Getter 1被恐龍帝國嘅火箭貫穿軀體一幕，只要加裝插背及更換穿肚組件，再拆走火箭中央部分，將其一分為二，最後前後分件嵌入Getter 1身體，就可以將呢一幕正式實體化。此外，Boxset亦附有右手扯甩火箭嘅造型組件，可以直接嵌入右手中，而且雕功精細，可見手掌拗斷恐龍火箭時，彈頭上嘅怪獸面相破碎扭曲，認真暴力！

捨身成仁玩自爆

EX Getter 1仲玩到另一款終戰甫士，就係從腹部扯出三一熔爐核心玩自爆，Boxset附有扯爛腹部管道，以及右手緊握核心嘅造型組件，玩家可透過連接喉管還原出嚟。當然玩戰損Look又點只得幾件Parts算數，做戲做全套，EX合金另一體貼之處，在於大量戰損Parts，包括上胸甲破裂組件、完全損毀嘅左掌，以及斷角加爛面頭部，一併換晒後，即時將Getter 1搞到周身傷痕纍纍，面目猙獰到冇人有，夠晒兇神惡煞！

查詢：2390 9843